“Muramura Dekenai Oiemu Matana Do Oi Dahua”

UNAI muramura be Iesu ese aposetolo edia negai Asia Minor ai ia noho Keristani kongregesen, Laodikea, totona ia gwauraia.

Iesu ia gwau: “Matana muramura danu do oi hoia, unai muramura dekenai oiemu matana do oi dahua, vadaeni gau do oi itaia diba.” Unai be matana dika gorerena momokani lasi, to lauma dalanai idia abia matakepuluna hanamoa totona. Laodikea dekenai idia noho Keristani taudia be idia noho siti ena kohu bada ese edia lalona ia veria bona lauma dalanai do idia abia gaudia idia laloa bada lasi.

Edia matana be unai gauna ese ia hadikaia herevana ia gwauraia neganai, Iesu ia gwau: “Oi gwau, ‘Lau be mai egu moni, bona gau ibounai lau dekenai be hegeregere vadaeni.’ To lasi. Oi diba lasi, to oi be namo lasi momokani, oi be bogahisihisi gauna, oi be ogogami, matakepulu, bona kopina kavakava.” Ena be unai idia diba lasi, kongregesen taudia ese matana hanamoa muramurana idia abia be namo, bona abia dalana tamona sibona be Iesu Keriso ena hadibaia hereva bona ena matahakani idia badinaia karana amo. Iesu ia gwau: ‘Lau dekena amo oi hoia.’​—⁠Apokalupo 3:​17, 18.

Laodikea dekenai idia noho taudia hegeregerena, hari Keristani taudia korikoridia idia gima be namo, namo lasi idia noho gabuna ai tauanina gaudia bona moale karadia laloa bada karana ese edia lalona idia ania, bona reana idia mamia lasi. Lauma dalanai ita do ia durua noho muramura be inai sisiba ese ia hahedinaraia: ‘[Iesu] dekena amo . . . matana muramura do oi hoia, unai muramura dekenai oiemu matana do oi dahua, vadaeni gau do oi itaia diba.’

Namona be ita laloatao, unai “matana muramura” ita hoia be namo. Ia be mai ena davana. Dirava ena hereva stadilaia bona laloa dobu karana dekenai eda nega ita habadaia be namo. Salamo torea tauna ese ita ia hadibaia, unai Hereva, be ‘diari hegeregerena, taunimanima edia lauma matana idia hadiaria.’​—⁠Salamo 19:⁠8.