Duahia Taudia Edia Henanadai
Heberu 12:4 dekenai, inai hereva “emui rarana be ia do bubua lasi, ani?” ena anina be dahaka?
Inai hereva ‘emui rarana ia bubua’ ena anina be idia haheauka ela bona mase, edia mauri rarana idia bubua momokani.
Aposetolo Paulo ia diba Heberu Keristani taudia haida be edia abidadama dainai, ‘hisihisi momo idia abia, to idia gini goada.’ (Heberu 10:32, 33) Paulo be unai ia herevalaia neganai, toana be Greek taudia edia spot gadara lalonai idia hekwarahi karana be laulau herevana bamona ia gaukaralaia, unai spot gadara lalonai idia heau helulu, heatu helulu, boksini, bona diskas bona io idia tahoa gadarana. Unai dainai, Heberu 12:1 (NW ) dekenai, Keristani taudia ia hagoadaia, ia gwau: “Ita idia hametaua gaudia ibounai bona ita ia guia kara dika do ita atoa siri, bena ita vairanai ia noho heau helulu lalonai do ita heau mai eda haheauka ida.”
Siri toi murinai, Heberu 12:4 dekenai, Paulo be reana heau helulu amo ia hanaia lao boksini gadarana dekenai. (Unai heau helulu bona boksini taudia be 1 Korinto 9:26 lalonai idia hedinarai.) Gunaguna boksini taudia edia imana bona ima ganagana dekenai be boromakau edia kopina amo idia karaia varo idia kwatua. Unai varo be reana “ledi, auri, eiava auri bamona gaudia” amo idia hametaua, unai ese “boksini taudia dekenai bero badadia ia havaraia.” Unai bamona dagedage gadara lalodiai rara idia bubua, bona nega haida mase idia havaraia danu.
Unai be reana herevana, to Heberu Keristani taudia be Dirava ena kamonai hesiai taudia momo edia sivarai idia diba, unai taudia be hisihisi bona dagedage karadia dikadia idia haheaukalaia, ela bona mase, anina be ela bona ‘edia rarana idia bubua.’ Paulo ese idaunegai abidadama taudia idia davaria gaudia ia herevalaia siridia mani oi itaia:
“Nadi dekenai idia hodoa, idia mase, iri dekenai idia utua kahana rua, idia mase, tuari kaia dekena amo idia aladia mase. Idia haida madi, mamoe kopina bona nanigosi kopina, dabua bamona idia karaia, idia loaloa. Idia be ogogami, hisihisi idia abia, bona taunimanima ese idia hadikadia.” Unai murinai Paulo ese iseda abidadama ia Durua Tauna, Iesu, ia gwauraia hedinarai, ia gwau: “Satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.”—Heberu 11:37; 12:2.
Oibe, momo idia haheauka ela bona ‘edia rarana idia bubua,’ anina be, ela bona idia mase. Edia haheauka karana be abidadama lasi karana ena kara dika dadaraia karana ia hanaia. Idia be dagedage badadia idia davaria to Dirava idia badinaia, edia abidadama idia dogoatao auka ela bona idia mase.
Ierusalema ena kongregesen dekenai idia matamata taudia be reana hisihisi dikadia idia ore murinai Keristani taudia ai idia lao, bona unai bamona hahetoho badadia idia davaria lasi. (Kara 7:54-60; 12:1, 2; Heberu 13:7) To, idia haida be unai gadara helulu idia karaia lasi badina hahetoho maragidia ese idia hamanokadia; idia ‘hesiku bona idia manoka.’ (Heberu 12:3) Lauma dalanai idia goada idia lao be namo. Unai bamona goada dainai do idia vara gaudia ibounai lalonai idia haheauka diba, herevana dagedage idia davaria ela bona edia mauri rarana idia bubua.—Heberu 6:1; 12:7-11.
Hari inai negai Keristani taudia momo be ‘edia rarana idia bubua,’ idia hamasedia badina edia Keristani tomadiho idia rakatania lasi. Namo lasi Paulo ena hereva Heberu 12:4 dekenai be gari bada gauna ai ita halaoa, to namona be ita abia dae unai hereva ese ia hahedinaraia iseda lalona ita hadaia Dirava do ita badinaia noho ela bona mase. Gabeai, unai Heberu taudia ia tore henia revarevana tamona lalonai, Paulo ia gwau: “Dirava ita tanikiu henia be namo. Bona namona be Dirava do ita tomadiho henia, mai hemataurai bona mai gari danu. Namona be iena gaukara do ita karaia, iena ura dala hegeregerena.”—Heberu 12:28.