‘Emai Lalokau Ia Habadaia’

FRIDAY, March 31, 2000 ai, Hokkaido, Japan dekenai, Usu Ororona be lagani 23 ia noho kava murinai ia pou. Unai gabu taudia tausen momo be dika gabuna amo idia heau siri. Momo ese edia ruma bona gaukara idia haboioa, to moale gauna be idia ta ia mase lasi. Idia heau mauri taudia huanai be Iehova ena Witnes taudia 46, to idia ese heduru bada idia abia.

Ororo ia pou dinana ai, unai gabu ena loaloa Keristani hesiai tauna ida heduru gaukarana idia hegaegaelaia. Daudau lasi murinai, kahirakahira idia noho kongregesen idauidau amo heduru gaudia idia abia. Japan ena brens ese gaukara ia biagua lalonai, heduru henia komiti idia haginia haraga, bona Japan ena kahana iboudiai amo Iehova ena Witnes taudia ese heduru moni idia siaia. Lauma gaukaradia durua totona, Iehova ena Witnes taudia edia ful-taim hesiai taudia be dika bada ia vara gabuna ena kongregesen dekenai idia siaia lao, bona sekit naria tauna ese unai gabu ia vadivadi henia loulou, hemami bona lauma dalanai heduru ia henia totona.

Unai nega aukana lalonai, dika ia vara gabuna ena Witnes taudia ese gabu namona ai, haida edia ruma dekenai, Keristani heboudia idia karaia noho. Kingdom Hall ia noho gabuna dekenai idia vareai diba neganai, tadikaka ese idia davaria unai Kingdom Hall rumana be ia gageva, makohi, bona ia dika momokani. Kingdom Hall kahirakahira ai, ororo ia pou neganai ia vara matuna amo kwalahu bada ia do lasi noho. Witnes taudia idia laloa, ‘Inai gabu dekenai hebou ita karaia noho be aonega karana, a? Kingdom Hall ita hanamoa diba, a?’

Edia lalona idia hadaia kahirakahira ai ia noho gabu namona dekenai Kingdom Hall matamata idia haginia be namo. Regional Building Committee ese heduru bada ia henia. Tano ibounai amo Witnes taudia ese unai konstraksen gaukara totona kontribusen monina idia siaia. Tano idia abia haraga, bona volantia taudia handred momo edia heduru dainai, nega sisina lalonai Kingdom Hall matamata idia haginia ore. Sunday, July 23, 2000 ai, taunimanima 75 be idia haginia Kingdom Hall matamatana dekenai idia karaia hebou ginigunana dekenai idia mai. Idia mai taudia momo be idia moale dainai idia tai. Unai lagani tamona ena October lalonai, Kingdom Hall idia hahelagaia neganai, unai gabu ena kongregesen ena elda ta ia gwau: “Ororo ia pou dainai dika bona hisihisi ai davaria. To, inai konstraksen ese emai gari be moale gauna ai ia halaoa. Emai lalokau Iehova bona emai Keristani tadikaka dekenai ia habadaia!”

[Picture Credit Line on page 19]

Eruption of Mount Usu: AP Photo/Koji Sasahara