Tanobada Hegegemadai Tauanina ai Dika Idauidau Idia Vara

CHRISTIAN be Africa tanona ta ai ia noho tauna. Tuari taudia ese ia idia dogoatao bona ia idia doria toho ami gaukarana ia karaia totona, to Baibel amo ena lalona ena mamina ia hadibaia dainai ia ura lasi. Bena tuari taudia ese ami kamepa ta dekenai ia idia abia lao bona unuseniai, dina 4 lalonai, ia idia dadabaia murinai, idia ta ese iena aena ia pidia. Christian be hospital dekenai ia lao diba, to ena tuina henunai ena aena idia utua oho. Africa ena tano ma ta ai, mai edia ipidi tuari taudia ese natudia maragidia danu edia aena o imana idia utua oho. Cambodia amo ia lao Balkans dekenai, bona Afghanistan amo ia lao Angola dekenai, tano lalonai idia hunia bomu ese matamata bona buruka taudia idia haberoa bona edia tauanina ena kahana ta idia hadikaia.

Danu, aksiden bona gorere haida, hegeregere suga gorerena, dainai tauanina ena kahana ta ia dika. Tanobada dekenai poisini dikadia dainai tauanina ai dika idauidau idia vara diba danu. Hegeregere, Eastern Europe siti kahirakahira dekenai idia noho natudia haida idia vara neganai, edia imana ena kahana ta ia noho lasi. Diuna henunai kahana kwadogina sibona ia noho. Gau haida ese idia hamomokania kemikol dikadia dainai, genetik hadikaia karana ia vara. Taunimanima ma haida be mai edia imana bona aena, to gorere haida dainai idia hamarerea diba lasi eiava idia manoka. Momokani, tanobada hegegemadai taunimanima edia tauanina ai dika idauidau idia vara.

Herevana ena badina be dahaka, to ta ena tauanina ena kahana ia dika neganai, iena mauri be auka. Junior ena mauri lagani be 20 neganai, ena aena laurina ena henunai kahana idia utua oho. Gabeai ia gwau: “Lau lalohisihisilaia bada. Lau taitai momo badina lauegu aena do lau abia lou lasi. Lau diba lasi dahaka do lau karaia. Lau daradara.” To gabeai, Junior ena lalohadai ia idau. Baibel ia stadilaia matamaia bona ena hekwakwanai ia haheaukalaia dalana ia dibaia sibona lasi, to helaro namona ia abia, vaira negana ai inai tanobada dekenai do ia moale. Bema emu tauanina ena kahana ta ia dika, oi ura Baibel ia gwauraia helarona oi abia danu, a?

Bema oibe, hereva gabena mani oi duahia. Oi ai hagoadaia emu Baibel lalonai ai gwauraia siridia oi duahia, bena Havaraia Tauna ese iena ura idia dibaia bona unai hegeregerena edia mauri idia haidaua taudia totona do ia karaia gaudia do oi itaia.