“Oi be Hahine Namona”

Unai hereva amo Moaba hahine matamata idia hanamoa. Ia be vabu hahine ladana Ruta, Israela hahine Naomi ena ravana hahinena. Lagani 3000 bamona gunanai, hahemaoro taudia idia lohia lalonai, Ruta be Israela dekenai ia noho, bona ia idia gwauraia hahine namona. (Ruta 3:​11) Edena bamona ia ese unai ladana namona ia abia? Daidia be iena haheitalai namona amo heduru idia abia diba?

Ruta be “nega ibounai ia gaukara” hahinena, hora momo lalonai ia gaukara goada, uma gabu dekenai idia moru bali ena anina ia gogoa totona, bona unai bamona gaukara badana ia karaia dainai ia idia hanamoa. Herevana idia gwau iena gaukara do idia hamaragia, to ia gaukara noho, bona ia karaia badabada. Ia be Baibel ese ia herevalaia hahine namona, ena gaukara ia diba momo bona ia gaukara momo hahinena hegeregerena momokani.​​—⁠Aonega Herevadia 31:​10-​31; Ruta 2:​7, 15-​17.

To taunimanima ese Ruta idia hanamoa ena badina badana be lauma dalanai ia hahedinaraia kara namodia​​—⁠ia manau, sibona ena ura ia dadaraia bona iena noho hanaihanai lalokauna. Ena tama sina bona tano ia rakatania, bona headava ese ia mailaia noho namona do ia davaria dalana be lasi, to Naomi ia badinaia noho. Danu, Ruta ese ia hahedinaraia ia ura Iehova, iena ravana hahinena ena Dirava, ia hesiai henia. Ruta ena namo ia hahedinaraia neganai, Baibel ia gwau, Naomi dekenai ia be ‘tatau 7 edia kara ia hereaia.’​​—⁠Ruta 1:​16, 17; 2:​11, 12; 4:​15.

Ena be Ruta ena kara namodia dainai ena bamodia huanai ia idia hanamoa, to mai anina bada gauna be Iehova ese ena kara namodia dainai ia hanamoa bada bona Iesu Keriso ena tubuna ta ai ia lao. (Mataio 1:5; 1 Petero 3:⁠4) Ruta ese Keristani hahinedia sibona dekenai lasi, to Iehova idia ura tomadiho henia taudia ibounai dekenai haheitalai namona ia hahedinaraia!