Idia Moale Badina Idia Duahiduahi Diba!

SOLOMON ISLANDS ena kahana haida dekenai, hari Iehova ena Witnes taudia ai idia lao taudia 80 pesen bamona be guna duahiduahi idia diba lasi dainai idia hekwarahi bada. Unai ese pura ta ta ena kongregesen hebou lalonai haere karana ia koua sibona lasi to ma haida dekenai Basileia ena hereva momokani hadibaia dalana ia koua danu. Sikuli dekenai idia lao lasi taunimanima badadia be idia duahiduahi diba, a?

Solomon Islands ena gabu ibounai dekenai, Apply Yourself to Reading and Writing buklet, Iehova ena Witnes taudia ese idia halasia gauna, be kahirakahira Iehova ena Witnes taudia edia kongregesen ibounai ena duahiduahi sikuli lalonai idia gaukaralaia. Henunai idia noho ekspiriens be unai sikuli ese momo ia durua bada dalana idia hahedinaraia. Mai anina bada gauna be, duahiduahi dalana idia dibaia ese idia ia durua, edia abidadama idia gwauraia hedinarai namonamo totona.​—⁠1 Petero 3:​15.

Kongregesen ta mai ena pablisa handred mai kahana dekenai idia siaia misinari taihu ta be pura ta ta lalonai Gima Kohorona amo Baibel be idia stadilaia neganai ia itaia, haida sibona be mai edia magasin bona momo idia haere lasi. Dahaka dainai? Badina be idia duahiduahi diba lasi. Kongregesen ese duahiduahi bona toretore sikuli hamatamaia totona hadibaia herevana idia gwauraia neganai, unai misinari taihu be mai moale ida hadibaia gaukarana totona ia volantia. Matamanai, stiuden haida sibona idia mai, to nega sisina murinai mauri lagani idauidau taudia 40 mai kahana idia mai matamaia.

Dahaka anina ia havaraia? Misinari taihuna ia gwau: “Duahiduahi bona toretore sikuli ia matamaia bona dina haida murinai, lau be 6 o’klok dabai maketi dekenai misinari ruma ena aniani hoia totona lau lao. Unuseniai stiuden haida lau itaia, maragidia danu, niu bona uma aniani idia hoihoilaia. Dahaka dainai? Badina be idia ura bada duahiduahi bona toretore sikuli lalonai do idia gaukaralaia peni bona noutbuk idia hoia! Danu, sikuli idia lao karana ese idia ia hagoadaia sibona edia Gima Kohorona magasin ena kopi ta idia abia totona.” Ma ia gwau: “Hari kongregesen ena Gima Kohorona Stadi lalonai, matamata bona buruka taudia idia haere, bona aiemai herevahereva be namo herea.” Unai misinari taihu ena klas taudia foa idia noinoi bema haroro gaukara lalonai idia vareai diba, badina idia hereva bamona, idia be “idia gari lasi,” bona unai neganai ia moale bada.

Duahiduahi bona toretore sikuli amo stiuden ta ta be duahiduahi bona toretore idia diba sibona lasi to idia dekenai namo bada ia havaraia. Hegeregere, lagani momo lalonai Witnes ta ena abidadama lasi hahine ena kara be kongregesen ese idia laloa momo. Ia badu neganai taunimanima be nadi amo ia hodoa bona hahine haida be au amo ia heatu henidia danu. Nega haida ena adavana ida Keristani heboudia dekenai ia lao neganai, ia mama bada herea dainai ena tau ese dina ena mata galasi ia karaia matamaia, unai amo unai hahine do ia gwau lasi ia be hahine haida ia itaia.

Duahiduahi bona toretore sikuli ia matamaia murinai, unai hahine ia henanadai: “Sikuli lalonai lau vareai diba, a?” Haere be, oibe. Unai nega amo, klas ta eiava kongregesen hebou ta ia reaia lasi. Ena duahiduahi lalonai ia hekwarahi bada bona ena diba ia bada haraga, unai ese ia hamoalea bada. Ena ura gauna iharuana be: “Baibel stadi lau abia diba, a?” Mai moale ida ena adavana ese ia stadi henia matamaia, bona ena duahiduahi bona toretore ia namo ia lao bona ena diba Baibel dekenai ia bada ia lao danu.

Mauri lagani 50 tauna ta, nega ta pensolo ia dogoatao lasi tauna, ese pensolo ta ia dogoatao bona alfabet ena leta ia torea sibona be hekwarahi bada herea gauna. Diba idia abia matamaia taudia haida edia ima kwakikwaki ai toto idia vara badina idia toretore neganai pepa dekenai pensolo idia doria auka. Pensolo dogoatao bona biagua namonamo totona pura momo idia hekwarahi murinai, stiuden haida be mai kiri ida idia gwau: “Pepa dekenai lau toretore namonamo diba!” Hadibaia taudia ese stiuden taudia idia itaia idia goada idia lao neganai idia moale. Hadibaia tauna ta ia gwau: “Klas ta lau hadibaia be moale gauna, bona klas ta ena dokonai, stiuden taudia ese edia imana idia patapataia amo idia hahedinaraia Iehova ese ia henia gauna idia laloa bada.”

Misinari taudia bona hari duahiduahi bona toretore idia dibaia Witnes taudia idia moale. Dahaka dainai? Badina be hari edia diba duahiduahi bona toretore dekenai idia gaukaralaia diba Iehova idia hanamoa totona.

[Pictures on page 14, 15]

Matamata bona buruka taudia ibounai ese duahiduahi bona toretore sikuli idia laloa bada