“Umui Diba Dahaka Dainai Emui Moni Lau Henia Giroa, A?”

‘O, MONI lau abia be namo!’ Unai be Nana ena hereva, ia be Kaspi, Republic of Georgia dekenai, ia noho adavana lasi sinana ta mai ena natudia memero toi. Daba ta ia ura abia gauna ia davaria. Pulisi steiseni kahirakahira lari 300 (K600) ia davaria. Ta ia noho lasi. Unai be moni bada. Momokani, lari idia gaukaralaia matamaia negana amo idia lao laganidia faiv lalonai, Nana be lari 100 (K200) pepa monina ia itaia lasi. Hoihoi taudia be unai bamona moni idia abia diba lasi, herevana lagani momo idia gaukara.

Nana ia laloa: ‘Inai moni ena namo be dahaka, bema egu abidadama ia mase, Dirava lau gari henia lasi, bona lauma dalanai lau manoka?’ Ia ese unai bamona Keristani karadia ia goadalaia, bona ia haheauka herevana ena abidadama dainai ia idia dagedage henia bada bona idia dadabaia.

Nana be pulisi steiseni dekenai ia lao neganai, ia itaia ofesa taudia faiv be mai hekwarahi ida gau ta idia tahua. Ia lalo-parara idia ese unai moni idia tahua, unai dainai idia dekenai ia lao bona ia gwau: “Gau ta umui haboioa, a?”

Idia haere: “Moni.”

“Hida?”

“Lari 300!”

Nana ia gwau: “Emui moni lau davaria.” Bena ia nanadaia: “Umui diba dahaka dainai emui moni lau henia giroa, a?” Idia diba lasi.

Ma ia gwau: “Badina lau be Iehova ena Witnes hahinena ta. Bema lau be Witnes lasi, emui moni lau henia giroa lasi.”

Moni ia haboioa pulisi ena badana ese Nana dekenai lari 20 (K40) ia henia, unai amo ia hahedinaraia Nana ena kara maoromaoro ia laloa bada.

Unai sivarai be Kaspi distrik ena kahana ibounai dekenai ia lao haraga. Unai dina murinai, pulisi steiseni ia hagoevaia hahinena ia raka lasi, bena Nana dekenai ia gwau: “[Pulisi ena badana] ena opesi dekenai be hanaihanai emui buka idia noho. Reana hari unai bukadia do ia laloa bada herea.” Pulisi ofesa ta ia gwau: “Bema taunimanima ibounai be Iehova ena Witnes taudia, daika ese taravatu utua karadia do idia karaia?”