“Emui Dika Umui Gwauatao Heheni Noho mai Emui Ura Ida”

OI ABIA dae Dirava ese emu dika ia gwauatao, a? United States ai, toana be taunimanima badadia momo ese unai idia abia dae. University of Michigan Institute for Social Research ai idia karaia stadi ia gunalaia toretore tauna, Dr. Loren Toussaint, ia gwau idia henanadai henia America taudia 1,423 amo, mauri lagani 45 idia hanaia taunimanima badadia 80 pesen bamona idia gwau Dirava ese edia dika ia gwauatao.

To, idia henanadai henia taudia 57 pesen sibona idia gwau ma haida edia dika idia gwauatao. Unai dainai, Iesu ena Haroro Herevana Badana ita laloa lou, ia gwau: “Badina be bema taunimanima edia dika umui gwauatao neganai, emui Tamana, guba dekenai ia noho ese emui dika danu do ia gwauatao. To bema taunimanima edia dika umui gwauatao lasi, emui Tamana ese emui dika danu do ia gwauatao lasi.” (Mataio 6:​14, 15) Oibe, Dirava ese iseda dika do ia gwauatao, bema mai eda ura ida ma haida edia dika ita gwauatao.

Aposetolo Paulo ese Kolose Keristani taudia dekenai inai hakaua herevana ia gwauraia. Ia hagoadadia: “Umui haheauka heheni bona emui dika umui gwauatao heheni noho mai emui ura ida bema ta be ma ta dekenai mai ena badu herevana ta. Iehova be mai ena ura ida umui emui dika ia gwauatao hegeregerena, umui danu unai bamona umui karaia.” (Kolose 3:​13, NW ) Momokani, nega haida unai bamona ita karaia be auka. Hegeregere, bema ta ese oi dekenai ia hereva kava eiava hebogahisi lasi herevadia ia gwauraia, reana ena dika oi gwauatao be auka.

To, dika gwauatao ena namo be momo. Taunimanima edia noho ia stadilaia tauna, Dr. David R. Williams, ese ena tahua karana ia herevalaia, ia gwau: “Ai davaria ma haida edia kara dika gwauatao karana ese lagani 50 bamona bona idia buruka vadaeni America taudia edia lalona ena namo ia habadaia.” Unai be aonega King Solomona ese ia torea hereva hegeregerena, lagani 3,000 bamona gunanai ia gwau: “Bema oiemu kudouna be mai ena maino danu neganai, oiemu tauanina do ia noho namo.” (Aonega Herevadia 14:30) Kara dika gwauatao karana ese Dirava ida bona eda dekena taudia ida hetura karana ia habadaia dainai, badina namona ia noho, mai eda ura ida iseda kudouna dekenai ma haida edia dika ita gwauatao noho totona.​––Mataio 18:35.