Ita Mauri Noho Ena Nega Namona

HAHETOHO oi davaria neganai, nega gunadia oi laloa lou, a? Aonega King Solomona ena hereva mani oi laloa: “Do oi hereva lasi inai bamona, ‘Badina dahaka nega gunadia be namo, to inai nega be ia dika noho?’ Badina inai bamona henanadai be aonega lasi.”​​—⁠Hadibaia Tauna 7:⁠10.

Dahaka dainai Solomona ese unai sisiba ia henia? Badina ia diba nega gunadia amo lalohadai maorona abia karana ese ta ia durua diba hari idia vara hekwakwanai ia haheaukalaia totona. Nega gunadia idia ura henia taudia idia laloaboio unai nega be hekwakwanai bona hekwarahi amo idia honu danu, bona unai nega ena mauri be ia namo momokani lasi. Nega gunadia ai gau haida be reana idia namo, to toana be ma haida be lasi. Solomona ena hereva hegeregerena, nega gunadia laloa lou karana be aonega karana lasi, badina nega gunadia ita lou henia diba lasi.

Mai ura bada ida nega gunadia ita ura henia be mai ena dika, a? Oibe, bema ita ia durua lasi hari inai nega ena mauri dalana ita manadalaia totona eiava bema ita ia koua dainai ita noholaia negana bona do ita abia diba helaro ita laloa bada lasi.

Momokani, hari be nega namona ita mauri noho totona, ena be tanobada ena hekwakwanai idia bada idia lao. Dahaka dainai? Badina ita be Dirava ena ura inai tanobada totona bona iena Basileia ena maino lohia negana ese do ia havaraia hahenamo idauidau do idia guguru negana kahirakahira dekenai ita noho. Baibel ena gwauhamata be inai: “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:⁠4) Bena, mauri be do ia namo herea dainai, ta lasi ese nega gunadia do ia ura henia.