Ia Koikoi Lasi Lalona Ena Mamina

DINA ta, Charles, Kenya ena iunivesiti ta dekenai ia gaukara tauna ta, be ena gaukara amo ruma dekenai ia lao noho neganai, ena mobael telefon ia haboioa. Kenya ai unai be davana bada gaudia.

Charles ia gwau: “Lau laloa lasi tau ta ese inai gauna lau dekenai do ia henia lou.” To, dina haida murinai, Iehova ena Witnes taudia edia brens opesi Kenya dekenai be ia idia ringi henia neganai, ia hoa bada herea. Ia idia hamaoroa ia mai iena mobael telefon ia abia totona neganai, ia hoa maragi lasi! Gabeai, Charles ia kamonai Iehova ena Witnes taudia edia ful-taim hesiai tauna ta be ia ida motuka tamona dekenai idia guia, bona unai hesiai tauna ese unai mobael telefon ia davaria. Unai hesiai tauna ese mobael telefon ena biaguna ia davaria haraga totona, brens opesi dekenai ia abia lao, bona unuseniai volantia gaukara idia karaia taudia ese mobael telefon dekenai ia hedinarai namba amo Charles idia ringi henia bona idia davaria.

Charles ese brens opesi ia tore henia revarevana lalonai ia gwau: “Ena be lau idia davaria totona be ia auka, to idia hekwarahi lau idia tahua dainai lau tanikiu bada herea. Lau ura emui orea taudia, inai mobael telefon ia davaria, lau ia tahua, bona lau dekenai ia henia lou taudia unai, lau tanikiu henia. Hari inai negai kara momokani tauna ta davaria totona be ia auka, to ita moale badina haida be kara momokani idia hahedinaraia taudia, idia be Iehova Dirava ena Witnes taudia.”

Gabu ibounai dekenai taunimanima idia diba Iehova ena Witnes taudia be kara momokani taudia. Idia be aposetolo Paulo idia tohotohoa, ia gwau: “Badina ai laloa aiemai kudouna ena laloa be maoromaoro, Dirava ena vairanai. Bona ai ura be nega ibounai kara maoromaoro do ai karaia.” (Heberu 13:18; 1 Korinto 11:⁠1) Idia lalo-parara unai bamona kara ese Iehova ia hanamoa, Iesu ia gwau bamona: “Umui emui diari taunimanima edia vairana dekenai unai bamona do umui hedinarai, vadaeni umui emui kara namodia do idia itaia neganai, umui emui Tamana guba dekenai do idia hanamoa.”​​—⁠Mataio 5:​16.