Basileia Haroro Ripoti
“Idia Mase Bona Lalodiaboio Taudia” Idia Lalodiatao
LAGANI 2001 ena matamana ai, Haykaz, Iehova ena Witnes merona ta ena mauri lagani 15, be Bern, Switzerland ai, “Idia Mase Bona Lalodiaboio Taudia” edia sivarai idia hahedinaraia rumana ia vadivadi henia. Unai be Nazi gavamani ese Iehova ena Witnes taudia idia dagedage henia ena sivarai idia hahedinaraia. Haykaz be ena vadivadi dokonai, ia gwau: “Nazi gavamani ese Iehova ena Witnes taudia idia dagedage henia bona hahisia ena sivarai be lau kamonai, to inai be nega ginigunana pepa bona foto ai unai negai idia vara gaudia lau itaia. Unuseniai lau itaia laulaudia, unai kara idia itaia taudia bona histori torea taudia edia hereva ese egu lalona bona kudouna idia hamarerea bada.”
Gabeai, haisikuli ai, Haykaz idia abia hidi ena klas turadia totona sivarai ta do ia torea neganai, ia abia hidi sinado be “Iehova ena Witnes taudia—Idia Mase Bona Idia Lalodiaboio Taudia.” Iena tisa ese gwaumaoro ia henia unai sivarai ia torea totona, to Haykaz ia hamaoroa tanobada bukadia amo ena hereva ia hamomokania danu be namo. Haykaz ese tisa ena hereva ia abia dae. “Nazi gavamani ena negai idia noho Iehova ena Witnes taudia idia herevalaia bukadia haida lau duahia bona edia hereva haida lau torea. Danu, “Idia Mase Bona Lalodiaboio Taudia” edia sivarai idia hahedinaraia rumana dekenai lau itaia gaudia dekenai egu lalohadai lau herevalaia. Unai rau 43 sivaraina lalonai foto idauidau lau atoa danu.”
November 2002 ai, Haykaz ese ia torea gauna be ena sikuli taudia, tisa, famili bona turadia vairanai ia herevalaia. Unai murinai be henanadai bona haere ena kahana, unai be nega namona ia ese idia dekenai Baibel ena hadibaia herevadia ia hahedinaraia totona. Helai taudia edia huana amo kekeni ta ia henanadai dahaka dainai ia ese unai sinado ia abia hidi neganai, Haykaz ia gwau histori bukadia momo ese Iehova ena Witnes taudia edia sivarai idia torea lasi dainai, ia ura taunimanima idia diba edena bamona Iehova ena Witnes taudia be mai boga auka ida edia Keristani abidadama ena maoro idia hamomokania. Iena hereva dainai, dahaka ia vara?
Haykaz ia gwau: “Egu sikuli turadia idia hoa. Idia diba lasi Iehova ena Witnes taudia haida be dagedage bada idia abia. Danu, momo idia diba lasi Nazi dibura kamepadia ai idia noho Iehova ena Witnes taudia be spesel maka ta idia atoa—ia be purple triangle.”
Haykaz ena hereva murinai, dala momo ia kehoa ia ese ena klas taudia ia haroro henia totona, bona rara henia hanai karana, kekero muramura bona kara maoromaoro badinaia karana dekenai Witnes taudia edia lalohadai Baibel amo ia herevalaia. Haykaz ia gwau: “Egu sikuli turadia ta lasi ese lau ia kirikirilaia.” Danu, ia torea sivaraina be hari sikuli ena laiberi ai ia noho. Unai amo taunimanima ese Iehova ena Witnes taudia edia boga auka karana do idia laloaboio lasi.