Lalo-Manoka Haheaukalaia Dalana

OI LALO-MANOKA, a? Inai daradara bona hekwakwanai momo negana lalonai, taunimanima momo idia lalo-manoka. Haida idia lalo-manoka badina moni gaukara idia karaia lasi. Ma haida be aksiden murinai idia davaria dika idia haheaukalaia noho. To, ma haida be ruma bese ena hekwakwanai, gorere badana eiava sibona idia noho ena hemami idia hekwarahilaia.

Bema oi lalo-manoka, edeseniai heduru oi tahua diba? Tanobada hegegemadai, taunimanima milioni momo be Dirava ena Hereva, Baibel, idia duahia karana amo goada idia davaria. Aposetolo Paulo ena hereva ese idia ia hagoadaia, ia gwau: “Dirava, iseda Lohiabada Iesu Keriso ena Tamana ita hanamoa. Ia be iseda Tamana, bona bogahisihisi bona durua ibounai ia henia Diravana. Aiemai hisihisi ibounai lalonai ia ese ai ia durua noho.” (2 Korinto 1:​3, 4) Emu Baibel lalonai unai siri bona ma siri haida oi duahia be namo, ani? Unai bamona oi karaia neganai, emu kudouna do ia hagoadaia bona do oi gini goada.​—⁠2 Tesalonika 2:⁠17.

Lalo-manoka oi haheaukalaia diba dalana ta be, Iehova idia tomadiho henia taudia oi bamoa be namo. Aonega Herevadia 12:25 ia gwau: “Laloa metau ese oiemu moale do ia koua, to hereva namodia ese oi idia hamoalea diba.” Keristani hebou dekenai ita lao neganai, unai “hereva namodia” ita kamonai, bona unai hereva “edia mamina be namo, lauma dekenai, bona tauanina dekenai.” (Aonega Herevadia 16:24) Iehova ena Witnes taudia edia Kingdom Hall hebouna ta dekenai oi lao, bona oi do ia hagoadaia momokani diba dalana be oi sibona ese do oi mamia.

Danu, oi ia durua diba dalana ta be guriguri. Bema mauri lalonai lalo-metau gaudia idauidau dainai oi lalohisihisi bada, guriguri ia Kamonaia Tauna dekenai emu hemami ibounai oi gwauraia. (Salamo 65:⁠2) Iseda Havaraia Tauna, Iehova Dirava, be ita ia diba namonamo, ita be siboda eda kara ibounai ita diba goevagoeva lasi. Heduru totona Ia ita tabekau henia diba. Iena Hereva ese ita ia gwauhamata henia: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.” (Salamo 55:22) Oibe, “Lohiabada dekenai idia abidadama henia taudia ese, edia goada do idia hamatamataia lou.”​—⁠Isaia 40:⁠31.

Lalo-manoka ita haheaukalaia totona, Iehova Dirava ese heduru bada gaudia be ita dekenai ia henia vadaeni. Idia do oi gaukaralaia, a?