Gadara Sibona Lasi
NATUDIA be idia ura dikadika idia gadara. To, buka ta ladana, The Developing Child ia gwau: “Ia be gau maragina lasi eiava gadara sibona lasi. Gadara amo natuna ese ia badinai idia noho gaudia ia manadalaia.” Gadara amo, natudia be edia hemami, idia badinai idia noho mauri gaudia bona taunimanima ma haida idia kara henidia daladia idia dibaia.
Natudia be mauri lagani foa eiava faiv neganai, edia gadara lalonai taunimanima badadia edia kara do idia tohotohoa matamaia. Iesu be nega ta natudia edia gadara ia herevalaia. Haida idia ura “headava aria” gadara idia karaia, haida idia ura “mase guria” gadara idia karaia bona vaia natudia edia kara, idia hepapahuahu badina haida idia ura lasi idia gadara. (Mataio 11:16, 17) Ia tubu noho natuna ena lalona dekenai, unai bamona gadara ese mai anina bada karadia ta ta ia hadibaia diba.
Inai laulau ese idia hahedinaraia inai natudia edia gadara lalonai, idia be Baibel hadibaia tauna bona stiuden ta idia tohotohoa. Unai be Baibel stadi momokanina lasi, to ma haida dekenai Baibel ena sivarai idia hadibaia ena lalohadai ia noho. Bona unai be mai anina bada gauna ta ia hadibaia, badina Iesu ese iena murinai idia raka taudia ibounai ia hagania taunimanima dekenai iena hadibaia herevadia ibounai do idia hadibaia bona hahediba taudia ai do idia halaoa.—Mataio 28:19, 20.
Natudia edia gadara lalonai Baibel stadi, tok idia henia, eiava ruma-ta-ruma-ta haroro gaukara idia tohotohoa neganai, edia tama sina be sibodia dekenai idia moale diba. Vaia, natudia be idia badinai idia noho taunimanima badadia edia kara idia tohotohoa. Natudia ese idia karaia Baibel gadara ese idia hahedinaraia edia tama sina be ‘idia dekenai Lohiabada ena hadibaia herevadia idia hadibaia.’—Efeso 6:4.
Tomadiho momokani lalonai Iehova ia ura natudia be mai edia maduna. Mose ia hamaoroa Taravatu idia duahia negadiai “memero bona kekeni” danu idia kamonai be namo. (Deuteronomi 31:12) Bema natudia idia mamia idia be mai edia maduna, edia gadara lalonai unai do ia hedinarai. Bona bema natu ta ena gadara lalonai Dirava ena haroro tauna ena kara ia tohotohoa, unai be dala ginigunana unai bamona tauna ai ia lao totona.