Aniani Negana—Aniani Ania Negana Sibona Lasi!

ITA ibounai be aniani namona ita moalelaia. Emu lalokau taudia ida oi helai bona aniani lalonai umui herevahereva hebou neganai, ia be boga kunu negana ta sibona lasi, to moale negana ai ia lao diba. Ruma bese momo be palani idia karaia dina ta lalonai nega ta ai idia aniani hebou totona. Aniani negana be ruma bese dekenai dala ia kehoa dina ta ta ena gaukara eiava palani idia kikilaia totona. Edia natudia edia hereva idia kamonai tama sina be edia natudia edia lalona bona hemami idia diba. Nega ia hanaia lalonai, aniani lalonai idia moalelaia hebamo karana namona ese ruma bese huanai noho namona, badinaia heheni, bona lalokau ia havaraia bona ruma bese ia hagoadaia danu.

Hari inai negai, ruma bese taudia momo be idia bisi bada bona gaukara momo idia karaia dainai, idia davaria idia aniani hebou be auka. Tanobada ena gabu haida dekenai, kastom karana dainai ruma bese idia aniani hebou lasi eiava aniani negadia ai idia herevahereva hebou lasi. Ruma bese haida edia kara be aniani negadiai TV idia kehoa, unai amo idia sibona huanai mai anina bada gaudia herevalaia karana ia koua.

To, namona be Keristani tama sina ese nega ibounai dala idia tahua edia ruma bese idia hagoadaia totona. (Aonega Herevadia 24:27) Idaunegai, tama sina idia hamaoroa, edia natudia idia hadibaia dala hereadaena ta be edia ‘ruma dekenai idia helai neganai.’ (Deuteronomi 6:⁠7) Hanaihanai aniani totona idia helai hebou neganai, dala hereadaena ia kehoa tama sina ese edia natudia dekenai, Iehova bona ena hakaua hereva maoromaorodia lalokau henia momokani karana idia hadibaia totona. Bema aniani negana lalonai umui moale bona noho hebou namonamo, emu ruma bese lalonai aniani negana be moale bona hagoadaia heheni negana ai do ia lao danu. Oibe, aniani negana be aniani ania negana sibona lasi!