Dagedage Neganai Oi Gari Lasi
DAGEDAGE taudia ese Paulo ena turadia Gaio bona Arisitako idia veria lao Efeso ena hebou rumana dekenai. Unuseniai, hora rua bamona idia boiboi badabada mai badu ida, idia gwau: “Efeso ena dirava, Diana, ia be bada herea momokani.” (Kara 19:28, 29, 34) Unai dagedage karana lalonai Paulo ena turadia idia gini goada, a? Unai hekwakwanai ia vara ena badina be dahaka?
Paulo be lagani toi mai kahana Efeso dekenai haroro gaukara ia karaia. Unai dainai, Efeso taudia momo be kaivakuku tomadiho henia karana idia rakatania. (Kara 19:26; 20:31) Diana be natuna momo havaraia siahuna ia henia diravana. Danu, Efeso hanua dekenai iena dubu badana be taunimanima momo ese idia itaia diba gabuna ai idia haginia. Diana ena kaivakuku maragidia be aiona eiava imana dekenai idia kwatua eiava edia ruma dekenai idia atoa diba. To, Keristani taudia be unai kaivakuku idia hoia lasi.—1 Ioane 5:21.
Siliva gaudia ia karaia tauna Demetrio ia gwau Paulo ese edia bisinesi gaukarana ia hadikaia. Demetrio ena hereva koikoidia amo iena bisinesi turadia edia lalona ia ania, ia gwau Paulo ena haroro gaukarana dainai, Asia ena tano taudia ibounai be Diana tomadiho henia karana do idia rakatania. Diana ena ladana idia abia isi totona mai badu ida idia boiboi badabada neganai, idia hebou rumana lalonai heai bada ia vara bona hanua taudia ibounai idia daradara.—Kara 19:24-29.
Taunimanima momo be hebou rumana lalonai idia hebou, unai ruma lalonai taunimanima 25,000 idia helai diba. Bona Paulo be dagedage taudia huanai ia hereva gwauraia neganai, lalonamo taudia ese idia hamaoroa do ia hereva lasi totona. Gabeai, gavamani tauna ta ese dagedage taudia huanai maino ia havaraia, vadaeni Gaio bona Arisitako be dika ta idia davaria lasi.—Kara 19:35-41.
Hari inai negai, Dirava ena taunimanima be haroro gaukara lalonai momo ese idia dagedage henidia danu. Nega momo sivarai namona be kaivakuku idia tomadiho henia taudia, matabodaga bona taravatu utua taudia huanai idia harorolaia goadagoada noho. To, idia be mai gari lasi ida aposetolo Paulo idia tohotohoa, ia ese Efeso taudia ia haroro henia neganai, ia gwau: ‘Umui dekenai lau haroro bona hadibaia neganai, emui ruma dekenai, bona taunimanima edia vairana dekenai durua hereva ta lau hunia lasi umui dekenai.’ (Kara 20:20) Iehova idia tomadiho henia taudia idia itaia ‘Lohiabada ena hereva ia bada daekau bona ia kwalimu’ neganai idia moale bada.—Kara 19:20.
[Picture on page 14]
Guna Efeso dekenai ia gini hebou rumana