Sikuli ai Iehova Idia Hanamoa

TANOBADA hegegemadai, Iehova ena Witnes memero bona kekeni be dala idia tahua sikuli gabudiai Dirava ena ladana idia hanamoa edia hereva bona kara amo. Haheitalai namona idia hahedinaraia matamata taudia edia sivarai mani ita itaia.

Greece dekenai, Witnes kekeni ta be tanobada ena hodahoda ia hadikaia gaudia dekenai ena ripoti ia torea. Gima Kohorona Bukadia Baibel Siri Indeks lalonai hereva haida ia tahua murinai Awake! magasin amo hereva haida ia davaria, bona ena ripoti dokonai ia gwau ena hereva be Awake! amo ia abia. Ena tisa ese ia hamaoroa ripoti ibounai amo ena ripoti be namo herea. Gabeai iena tisa ese hebou ta lalonai unai ripoti ia gaukaralaia bona anina namona ia vara. Unai matamata taihu ese tisa dekenai Awake! matamatadia ia henia, hegeregere idia ta be “Teachers​​—⁠What Would We Do Without Them?” Gabeai, klas dekenai tisa ese unai Awake! magasin ia hanamoa, bona stiuden ma haida be unai magasin ena kopi haida totona idia noia. Taihu ese magasin momo be sikuli gabuna dekenai ia abidia lao idia duahia totona.

Africa, Benin dekenai, Keristani matamata ta be hahetoho idauna ta ia davaria. Ena sikuli dekenai stiuden haida edia tama sina ese tisa haida dekenai moni idia henia, unai amo idia ese stiuden idia hegaegaelaia eksam totona. To unai idia karaia totona tisa ese Saturday daba idia abia hidi. Witnes matamata ese unai lalohadai ia dadaraia, ia gwau: “Saturday dabai be kongrigeisen ibounai idia haroro hebou negana. Bona wiki lalonai unai nega lau moalelaia bada, unai dainai do lau reaia lasi!” Ena tamana, adavana lasi Witnes tauna, ese unai lalohadai ia abia dae bona tama sina bona tisa haida ia noia unai sediual idia haidaua totona. To, idia abia dae lasi. Unai kekeni matamata ese ena lalona ia hadaia do ia lao lasi, to ena kongrigeisen do ia bamoa haroro gaukara totona. Ena sikuli turadia ese ia idia kirikirilaia, bona ena lalona idia ania ena haroro gaukara bona ena Dirava do ia rakatania totona. Idia laloa ena eksam do ia kwalimulaia lasi. Saturday daba idia lao stiuden taudia be idia kwalimu lasi, to iseda taihu ia kwalimu. Unai dainai edia hevaseha karana idia hadokoa. Bona stiuden ese ia idia hamaoroa, “Emu Dirava oi hesiai henia noho be namo.”

Czech Repulic ai, mauri lagani 12 kekenina be ripoti ta ia hegaegaelaia. Bona ena sinana ese ia hagoadaia Tau Hereadaena bukana do ia gaukaralaia. Ena ripoti be inai henanadai amo ia matamaia: “Dahaka oi laloa? Tanobada dekenai ia noho Tau Hereadaena be daika?” Bona ia ese Iesu ena sivarai, ena mauri tanobada dekenai, bona ena hadibaia herevadia ia gwauraia. Bena, inai buka ena karoa ladana “Dika Gwauatao Karana” ia herevalaia. Ena tisa ia gwau, “Lau kamonai ripoti ibounai amo unai be ripoti namo hereana!” bona mai moale ida unai buka ena kopi ta ia abia. Stiuden ma haida danu ese unai buka idia ura henia. Murina dinana ai, unai kekeni ese buka ibounai 18 ia hariharilaia.

Unai bamona matamata taudia momo be sikuli gabudiai Iehova ena ladana idia hanamoa karana amo moale idia davaria. Ita ibounai ese edia haheitalai ita tohotohoa be namo.