Laolao Daudauna Ena Hahenamo

DEMOCRATIC Republic of Congo amo taihu rua edia sivarai ia mai, idia ruaosi be vara hebou, bona idia be tuari gabuna dekenai laolao daudauna ta idia karaia, Lisala ai “Dirava Ita Hanamoa” Distrik Hebouhebouna idia lao henia totona. Hebouhebou dekenai lauma aniani bona Keristani hebamo namona idia abia sibona lasi, to idia ura danu Kinshasa dekenai Iehova ena Witnes taudia edia brens opesi amo idia mai tadikaka haida idia hedavari henidia. Unai tano ai tuari ia vara dainai, idia be lagani momo lalonai brens tadikaka ta idia itaia lasi, bona idia ura unai nega ai do idia hedavari henidia.

Unai taihu rua be Basankusu amo Lisala dekenai idia lao totona, vanagi amo sinavai rua bona uda badadia huanai idia lao, unai be kilomita 300 bamona. Unai laolao be pura toi lalonai idia karaia. Idia ruaosi be ful-taim hesiai gaukarana idia karaia, ta be lagani toi bona ta be lagani 19 lalonai, bona unai laolao lalonai Basileia ena sivarai namona idia harorolaia danu. Idia be hora 110 bamona idia gaukaralaia idia davaridia taudia idia haroro henidia totona, pepapepa 200 bona magasin 30 idia hariharilaia.

Sinavai ai, unai gabu ena hippopotamus bona huala be momo dainai, idia lao namonamo be namo. Hanuaboi ai idia lao diba lasi, badina gabu do idia itaia namonamo lasi! Tuari taudia ese idia naria sekea gabudia momo idia hanaia danu.

Ena be unai taihu rua edia laolao be daudau bona idia hesiku, to idia hekwarahi dainai idia moale. Idia ruaosi idia moale bona idia tanikiu badina Lisala ena hebouhebou dekenai idia noho. Mai edia kudouna ibounai ida hereva momokani idia laloa bada, bona idia noho tadikaka bona taihu 7,000 edia hebamo namona ese idia ia hagoadaia. Hebouhebou ia ore murinai, unai dala tamona ma idia badinaia edia hanua dekenai idia giroa lou totona. Bona hanua dekenai idia ginidae neganai, idia davaria edia ruma bese be idia namo.