“Sivarai Ma Haida Ai Dekenai Oi Gwauraia!”

RUSSIA ena gabu ta, Nezlobnaya ai, haisikuli ta dekenai klas ta be Russia ena buka torea tauna Mikhail Bulgakov ese ia torea buka idauidau idia stadilaia. Ia torea buka ta lalonai Iesu Keriso ena ladana ia hadikaia, to Satani ena ladana ia abia isi. Klas taudia be unai buka idia herevalaia murinai, tisa ese idia dekenai test ia henia edia diba unai buka dekenai ia tohoa totona. To, stiuden ta ladana Andrey, ena mauri lagani be 16 Iehova ena Witnes merona ta, ese mai hemataurai ida tisa ia hadibaia unai test do ia karaia lasi, badina ena lalomamina ese ia hadibaia unai bamona buka ia stadilaia be maoro lasi. Ena tisa ia hamaoroa bema namo ripoti ta do ia torea bona do ia hahedinaraia namonamo ia ese Iesu be edena bamona ia laloa. Tisa ese unai ia abia dae.

Andrey ena ripoti lalonai, ia hahedinaraia ia be ma haida edia lalohadai ia matauraia, bona ia diba Iesu idia diba totona dala hereadaena be Evanelia bukadia ta lalonai ena sivarai idia duahia. Bema unai bamona idia karaia, “Iesu ena mauri bona ena hahediba daladia do idia diba goevagoeva.” Andrey ma ia gwau: “Unai buka ese Satani ia gwauraia dalana danu ita laloa be namo. Haida be unai buka ese Satani ia gwauraia dalana idia duahia neganai, idia kirikirilaia, to lau laloa unai be kiri gauna lasi.” Andrey ese ia hahedinaraia, Satani be lauma dikana ta mai ena siahu bona Dirava ia dadaraia, bona ia ese gwau-edeede karadia bona taunimanima dekenai hisihisi ia havaraia. Andrey ena ripoti dokonai, ia gwau: “Bulgakov ena buka duahia karana ese lau dekenai namo do ia havaraia lasi. To, Iesu Keriso ena sivarai momokani lau diba totona Baibel lau duahia be mai anina bada.”

Andrey ena tisa be unai ripoti dekenai ia moale bada dainai, Andrey ia hamaoroa Iesu Keriso ena sivarai amo ripoti ta do ia hegaegaelaia. Andrey ese unai ia abia dae. Unai klas idia abia lou neganai, Andrey ese unai ripoti be ena klas taudia ibounai edia vairanai ia duahia. Bona ia hahedinaraia goevagoeva dahaka dainai ia laloa Iesu be tau hereadaena. Bena Iesu ena mase sivaraina be Mataio ena karoa ta lalonai ia duahia. Andrey ena ripoti ena nega ia ore dainai, ia ura ena hereva ia hadokoa, to ena klas taudia idia gwau: “Sivarai ma haida ai dekenai oi gwauraia! Ai ura diba gabeai dahaka ia vara?” Unai dainai ia ese Mataio ena karoa haida lalonai Iesu ena toreisi lou sivaraina be idia vairanai ia duahia.

Andrey ena ripoti ia duahia ore murinai, ena klas turadia be idia ura Iesu bona Iehova idia diba dainai henanadai momo idia henia. Andrey ia gwau: “Lau ese Iehova lau guriguri henia aonega ia henia totona, bona egu guriguri ia kamonai.” Badina “edia henanadai ibounai lau haerelaia diba!” Klas murinai, Andrey ese ena tisa dekenai Tau Hereadaena buka ena kopi ta ia henia,a bona tisa be mai ura bada ida unai buka ia abia. Andrey ia gwau: “Ripoti dekenai maka namona lau abia bona tisa ese lau ia hanamoa, badina lau abia dae gaudia be mai gari lasi ida lau gwauraia hedinarai. Danu, tisa ia gwau ia ese lau herevalaia gaudia haida ia abia dae.”

Andrey ia moale bada badina Baibel amo ia hadibaia lalomamina ia badinaia, bona Iehova bona ena Natuna, Iesu Keriso ese idia inai henia bukadia ia duahia lasi. Andrey be unai bamona ia karaia dainai, unai ese Baibel ena lalohadai ida ia hegergere lasi lalohadaina amo ia ia gimaia sibona lasi, to danu dala ia kehoa ma haida dekenai Baibel ena hereva momokani ia gwauraia hedinarai totona.

[Footnote]