Oi Ura Tura Namodia Oi Davaria, A?

TAUNIMANIMA momo idia ura tura namodia idia davaria. Emu tura namodia dekenai emu mauri lalonai idia vara gaudia oi herevalaia karana ese oi do ia hamoalea. To, edena dala ai tura namona ta oi davaria diba? Kahirakahira lagani 2,000 gunanai, Iesu ese ia hahedinaraia tura namodia oi davaria totona, sibona emu ura dadaraia lalokauna oi hahedinaraia. Ia gwau: “Umui be umui ura taunimanima ese umui dekenai idia karaia hegeregerena, umui danu inai bamona do umui karaia idia dekenai.” (Luka 6:​31) Unai hereva ese ia hahedinaraia, tura namodia oi davaria totona, namona be sibona emu ura oi dadaraia. Bema tura namodia oi ura, namona be oi sibona be tura namona ta ai oi lao. Edena dala ai?

Tura namodia be do oi davaria haraga lasi. Momokani, tura namodia be oi diba taudia sibona lasi. To, idia be oi ura henidia bada taudia. Tura namona oi davaria be mai ena hekwarahi. Hetura karana ena anina be emu turana ena ura gaudia oi atoa guna bona oiemu be gabeai. Tura namodia be edia moale gaudia sibona idia herevalaia lasi, to mauri lalonai idia davaria hekwakwanai idia herevalaia danu.

Turana namona ese hemami bona tauanina dalanai ta dekenai heduru ia henia. Aonega Herevadia 17:17 ia gwau: “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.” Momokani, hetura karana namona ese ruma bese lalonai ia noho hetura karana ia hereaia diba. Aonega Herevadia 18:24 ia gwau: “Turana haida be turana koikoi taudia sibona, to turana ta ia noho, iena turana kara, ese tadikaka ta ena lalokau ia hereaia noho.” Oi ura oi diba edena dala ai tura namona ta oi abia diba, a? Oi ura idia lalokau heheni taudia huanai oi noho, a? (Ioane 13:35) Bema oibe, emu gabu dekenai idia noho Iehova ena Witnes taudia be mai moale bada ida oi do idia durua tura namodia oi davaria totona.