Duahia Taudia Edia Henanadai
Lagani 1,000 ena dokona ai, hahetoho ginigabena murinai taunimanima be do idia kara dika bona mase, a?
Apokalupo bukana ena siri rua be inai bamona idia hereva: “Mase, bona mase taudia edia gabu, be lahi gohuna lalonai ia negea diho. Inai lahi gohuna be mase iharuana.” (Apokalupo 20:14) “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”—Apokalupo 21:4.
Do idia vara gaudia mani ita laloa. Aramagedono amo idia roho mauri taudia, mase amo idia toreisi lou taudia, bona Aramagedono murinai idia vara natudia be “buka lalonai ia torea hegeregerena” hahemaoro idia abia murinai, “Mase bona mase taudia edia gabu” be lahi gohuna lalonai do idia negea diho. (Apokalupo 20:12, 13) Apokalupo karoa 21 lalonai aposetolo Ioane be matahanai ma ta ia herevalaia, bona unai be Keriso Ena Lagani 1,000 Lohia Negana lalonai do ia guguru. To, unai matahanai be Lagani 1,000 Hahemaoro Dinana ena dokona ai do ia guguru momokani. Iesu be ena Tamana dekenai Basileia do ia henia lou murinai, Dirava bona taunimanima huanai do ia gini tauna ta be lasi, bona unai neganai laulau dalanai Iehova be “ena taunimanima” ida do ia noho. Keriso ena boubou karana dainai do idia goevadae taudia dekenai inai gwauhamata, ‘Mase be do ia ore’ be do ia guguru momokani.—Apokalupo 21:3, 4.
Unai dainai, Apokalupo 20:14 bona 21:4 ese idia herevalaia Adamu amo ia mai masena, be Keriso ena mauri davalaia boubou gauna ese do ia kokia vaitani. (Roma 5:12-21) Adamu amo ia mai mase be do ia ore vaitani bona taunimanima be do idia goevadae, Iehova ese Adamu ia havaraia neganai ia goevadae hegeregerena. Ena be Adamu ia goevadae, to bema ia kara dika ia mase diba. Iehova ese Adamu ia hamaoroa “kara namo bona kara dika hadibaia au ena huahua” do ia ania lasi, bona ia gwau: “Inai huahua oi ania dina dekenai do oi mase momokani.” (Genese 2:17) Adamu ia mase badina mai ena ura ida unai kara dika ia karaia. Lagani 1,000 negana ena dokona ai, hahetoho ginigabena murinai, taunimanima be mai edia ura kwalimu. (Apokalupo 20:7-10) Ta ta be mai edia ura kwalimu dainai, sibodia ese abia hidi do idia karaia, Iehova do idia hesiai henia eiava lasi. Reana, ta ese Dirava do ia gwau-edeede henia lasi, Adamu ia karaia bamona.
Hahetoho ginigabena murinai, Mase bona mase taudia edia gabu be lasi dainai, bema tau ta ia gwau-edeede dahaka do ia vara? Unai neganai, Adamu ena amo ia vara mase be do ia ore. Bona Hades, taunimanima idia guria gabuna bona toreisi lou helarona be do idia noho lasi. To, do ia gwau-edeede tauna be Iehova ese lahi gohuna lalonai do ia negea bona ia totona toreisi lou helarona be lasi. Unai gwau-edeede tauna ena mase be Adamu bona Heva dekenai ia vara gauna bamona.
To, reana unai do ia vara lasi. Badina, hahetoho ginigabena amo idia roho mauri taudia be Adamu amo idia idau. Idia be Iehova ese ia tohodia bona idia kwalimu vadaeni. Danu, ita diba momokani unai hahetoho lalonai Iehova ese edia lalona bona ura ia tahua namonamo. Unai dainai, edia ura kwalimu idia gaukaralaia kerere taudia be hahetoho ginigabena ai Iehova ese do ia haoredia. Reana, hahetoho ginigabena ai idia kwalimu taudia haida be Dirava do idia gwau-edeede henia bona Ia ese do ia hamasedia diba. To, reana unai be do ia vara lasi.
[Picture on page 17]
Hahetoho ginigabena murinai, edena dala ai taunimanima be Adamu hegeregerena do idia goevadae?