Mauri Bona Taunimanima Ia Laloa Bada Tauna

IEHOVA ENA WITNES taudia edia Hakaua Orea ena memba tauna ta Daniel Sydlik, be Tuesday, April 18, 2006 ai ia mase. Ena mauri lagani be 87 bona New York, Brooklyn Betele ai lagani 60 ia gaukara.

Ia be lagani 1946 ai Betele dekenai ia vareai bona ena turadia momo ese ia idia gwauraia tadikaka Dan. Betele ia do lao lasi neganai, ia be spesel painia gaukara ia karaia California dekenai bona Tanobada Tuarina Iharuana lalonai, ena Keristani gini siri karana dainai, ia be dibura ruma ai ia noho. Ena mauri sivaraina be June 1, 1985, The Watchtower ena ladana “How Priceless Your Friendship, O God!” lalonai idia hahedinaraia goevagoeva.

Tadikaka Sydlik be manau tauna bona taunimanima idia gari lasi ia idia hereva henia totona. Betele ruma besena totona dina ena siri ia hakaua neganai, ena hamatamaia herevana amo ia hahedinaraia mauri ia laloa bada: “Ita moale badina ita mauri bona mauri Diravana ita hesiai henia diba.” Taunimanima vairanai tok ia henia neganai unai lalohadai be ma haida dekenai ia gwauraia, hegeregere ia henia pablik tok haida be, “Edia Dirava be Iehova, Ena Bese Taudia be Idia Moale,” “Iehova Ena Moale Ita Hahedinaraia Noho,” “Dirava Ena Lauma Helaga Koua Lasi,” bona “Mauri Hereadaena be Gabeai Do Ia Vara.”

Lagani 1970 ai, Tadikaka Sydlik ese England hahinena Marina Hodson ia adavaia, bona ia gwau Marina be “Dirava ese ia henia harihari gauna.” Idia ruaosi be lagani 35 lalonai Iehova idia hesiai henia.

Tadikaka Sydlik be Betele ai ia noho laganidia lalonai, ia be dipatmen idauidau dekenai ia gaukara, hegeregere printa gabuna bona Toretore Dipatmen ai. Danu ia be reidio steiseni WBBR dekenai ia gaukara. Bena November 1974 ai, ia idia abia hidi Hakaua Oreana ena memba ta ai ia lao bona gabeai Gaukara Taudia Naria bona Toretore Komiti ida ia gaukara hebou.

Lagani 30 ia hanaia lalonai, tadikaka Sydlik be Gaukara Taudia Naria Komiti ida ia gaukara neganai, ia hahedinaraia taunimanima ia laloa bada. Iena gado regena mai goadana amo taunimanima momo ia hagoadaia, hanaihanai Iehova hesiai henia ena hahenamo hereadaena ia herevalaia. Ia hahedinaraia moale korikori ita davaria diba, bema Iehova ita tura henia bona mauri ita laloa bada.

Ena be Tadikaka Sydlik be Betele ruma bese ese idia reaia bada, to mauri bona taunimanima ia laloa bada karana be do idia laloaboio lasi. Ita diba momokani ia be Apokalupo 14:13 ese ia gwauraia taudia huanai ia noho: “Lohiabada idia abidadama henia noho neganai idia mase taudia be do idia moale.” Ma Lauma Helaga danu ia hereva, ia gwau, “Oibe, idia ese edia gaukara mai hekwarahi dekena amo do idia laga-ani, bona idia be do idia laga-ani kava lasi. Badina be edia kara namodia ena sivarai, be idia danu nega tamona do ia lao noho.”