Dirava ese Oi Ia Itaia, A?
HAVARAIA Tauna, Iehova, ese oi ia itaia, a? Oibe! Baibel ia gwau: “Dirava ese iseda matana ia karaia, be Dirava ese ia itaia diba lasi, a?” (Salamo 94:9) Iehova ese gau ibounai ia itaia diba, taunimanima bamona lasi. Ia ese iseda toana sibona ia itaia lasi, to iseda ‘kudouna ia tohoa’ danu. (Aonega Herevadia 17:3; 21:2) Oibe, iseda ura gaudia bona lalohadai be ia diba.
Iehova be iseda mauri lalonai ita mamia hekwakwanai ia diba, bona iseda noinoi ia kamonai. Salamo torea tauna ia gwau: “Lohiabada ese kara maoromaoro taudia ia naria [“itaia,” BHğ] noho. Edia taitai be ia ese ia kamonai henia noho. Lohiabada be lalohisihisi taudia kahirakahira ia noho, bona ia ese edia lalona ia ore taudia ia hamauria noho.” (Salamo 34:15, 18) Ita moale badina ita diba Iehova be iseda noho dalana ia lalopararalaia bona guriguri ia kamonai!
Iehova Dirava ese hehuni dekenai ita karaia gaudia ia itaia danu. Oibe, “Dirava ese ia karaia gaudia ibounai nega ibounai ia itaia noho. Idia be hanaihanai iena matana edia vairanai idia noho. Bona Dirava ese danu iseda kara do ia kota henia.” (Heberu 4:13) Unai dainai, ena be iseda kara be namo o dika, to Dirava ese ia itaia. (Aonega Herevadia 15:3) Hegeregere, Genese 6:8, 9 (NW ) ia gwau, ‘Iehova be Noa dekenai ia moale’ bona ia be “Dirava momokanina ida ia raka.” Oibe, Noa be Iehova ena lalonamo bona hahenamo ia abia, badina Dirava ia kamonai henia bona Iena taravatu goevadia ia badinaia. (Genese 6:22) To, Noa ena negai idia noho taudia be idia dagedage bona kara dikadia idia karaia. Dirava be unai kara ia itaia. Ia “ese taunimanima ia itaia, edia kara dika be bada herea gabu ibounai dekenai, bona edia laloa be nega ibounai ia dika sibona mo.” Daudau lasi murinai, Iehova ese kara dika taudia ia haorea, to Noa bona ena ruma bese ia hamauridia.—Genese 6:5; 7:23.
Iehova ese oi do ia lalonamo henia, a? Momokani, Iehova ena matana be “tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” (2 Sivarai 16:9) Kahirakahira Dirava ese kara dika taudia do ia haorea bona manau taudia do ia hamauria.—Salamo 37:10, 11.