Duahia Taudia Edia Henanadai
Iesu be Israela ena tano ibounai dekenai haroro gaukara ia karaia. Unai dainai, Iuda taudia bona edia lohia taudia be Iesu idia hamasea neganai, dahaka dainai aposetolo Petero ia gwau, idia “diba lasi” dainai unai bamona idia karaia?—Kara 3:17.
Petero be Iesu ena mase dalana idia karaia taudia ia hereva henidia neganai, ia gwau: “Lau diba Iesu dekenai inai kara umui karaia badina be umui diba lasi dekenai. Emui lohia taudia danu be idia diba lasi.” (Kara 3:14-17) Iuda taudia haida be Iesu bona ena hahediba herevadia idia lalopararalaia lasi. To ma haida be Iesu idia dadaraia badina Iesu idia mama henia, idia inai henia bona idia ura lasi Dirava idia hamoalea.
Momo idia ura lasi Iehova idia hamoalea dainai, Iesu ena hahediba herevadia idia abia dae lasi karana, mani ita laloa. Nega momo Iesu be haheitalai ia gaukaralaia, bona idia ura diba ma haida idia abia taudia dekenai edia anina ia gwauraia hedinarai. To Iesu idia kamonai henia taudia haida be idia raka siri bona idia ura lasi unai haheitalai edia anina idia diba. Nega ta, hahediba taudia haida be Iesu ia gaukaralaia laulau herevana ta dainai idia badu. (Ioa. 6:52-66) Unai bamona taudia idia laloparara lasi Iesu be ia gaukaralaia haheitalai amo idia ia durua, edia kara bona lalohadai idia haidaua totona. (Isa. 6:9, 10; 44:18; Mat. 13:10-15) Danu idia be peroveta herevana ta idia diba lasi, ia gwau, Mesia be ena hahediba gaukarana lalonai parabole bona haheitalai momo do ia gaukaralaia.—Sal. 78:2.
Haida be Iesu idia lalodika henia kava dainai, ena hahediba herevadia idia dadaraia. Iesu be ena hanua, Nasareta ena sinagoga lalonai ia hahediba neganai, taunimanima be idia “hoa bada.” To idia abia dae lasi Iesu be Mesia bona iena diba bona bese idia hepapahuahulaia: “Inai tau ese inai gau edeseni ia davaria? . . . Inai be kamuta tauna, a? Maria ena natuna, Iamesi bona Iose bona Iuda bona Simona edia kakana, a? Iena taihuna idia danu ita dekenai idia noho, a?” (Mar. 6:1-3) Nasareta taudia dekenai Iesu ena ruma bese be ladana bada lasi taudia, unai dainai idia laloa Iesu ena hahediba herevadia be anina lasi.
Tomadiho gunalaia taudia be edena bamona? Idia momo be Iesu idia kamonai henia lasi. (Ioa. 7:47-52) Danu, idia mama bona iena hahediba herevadia idia dadaraia badina taunimanima be Iesu idia kamonai henia. (Mar. 15:10) Iesu ese ladana bada taudia ia gwauraidia koikoi taudia dainai, idia badu. (Mat. 23:13-36) Idia be mai edia ura ida Iesu idia dadaraia dainai, Iesu ese ia gwau henidia be maoro, ia gwau: “Taravatu hadibaia taudia, madi umui be dika. Badina be aonega ena ki umui abia siri vadaeni. Umui be umui raka vareai lasi [Basileia lalonai], bona raka vareai ura taudia edia dala umui koua.”—Luka 11:37-52.
Iesu be lagani toi mai kahana lalonai Israela ena tano dekenai sivarai namona ia harorolaia. Danu ia ese taunimanima momo herea ia hadibaia unai gaukara idia karaia totona. (Luka 9:1, 2; 10:1, 16, 17) Iesu bona ena hahediba taudia edia gaukara ese anina namona ia havaraia dainai, Farisea taudia idia maumau, idia gwau: “Tanobada ibounai be iena murina dekenai idia raka vadaeni.” (Ioa. 12:19) Unai dainai ita gwau diba Iuda taudia momo be Iesu idia diba, to idia abia dae lasi ia be Mesia. Idia be edia diba bona lalokau Mesia dekenai idia habadaia diba, to unai bamona idia karaia lasi. Haida be Iesu ena inai taudia ida idia gaukara hebou, Iesu idia hamasea totona. Unai dainai, aposetolo Petero be idia momo dekenai ia gwau: “Inai dainai umui emui lalona umui giroa, bona Dirava ese emui kara dika do ia kokia. Gabeai Lohiabada ese goada matamata do ia henia umui dekenai. Bona Dirava ese Keriso umui dekenai do ia siaia mai, ia ese guna umui totona ia Abia Hidi Tauna, Iesu unai.” (Kara 3:19, 20) Gabeai, Iuda taudia tausen momo bona “hahelagaia taudia momo danu” be Iesu idia kamonai henia matamaia. Idia be “diba lasi” taudia bamona idia kara lasi. To, idia helalo-kerehai bona Iehova ena lalonamo idia abia.—Kara 2:41; 4:4; 5:14; 6:7.