Dala Idauna Ma Ta Ai Idia Haroro Ese Anina Namona Ia Havaraia

OI HEGAEGAE dala idauna ma ta ai emu teritori ai ma haida oi haroro henia totona, a? Finland dekenai, davara badinai ia noho siti ladana Turku ai, iseda Keristani tadikaka be unai bamona idia karaia dainai, anina namona idia davaria.

Nega ta, Turku ai idia noho tadikaka taihu idia kamonai Asia tatau haida be taoni dekenai idia ginidae bona sisima badana ta idia hanamoa totona. Gabeai, tadikaka ta ese unai tatau idia noho gabuna ia davaria. Danu, ia kamonai unai tatau be daba momokani ai basi ese edia hotel amo ia abidia bona edia gaukara gabuna dekenai ia abidia lao. Maoromaoro unai tadikaka ese Turku ena English gado kongrigeisen tadikaka ia hadibaia.

Unai kongrigeisen ena elda taudia idia itaia unai be nega namona idau tano amo idia mai taudia dekenai Basileia sivaraina idia harorolaia totona, unai dainai karaharaga idia hegaegae unai tatau idia haroro henia totona. Sunday, seven o’klok dabai, pablisa 10 be basi stopu ai idia haboua. Matamanai, gaukara tauna ta ia hedinarai lasi dainai, tadikaka idia henanadai, ‘Ita leiti, a?’ ‘Reana idia lao vadaeni, ani?’ To nega sisina murinai gaukara tauna ta ia mai, ia be ovarol ia karaia. Ia murinai gaukara tauna ma ta ia mai, bena iboudiai idia ginidae. Daudau lasi murinai, basi stopu ai gaukara taudia momo idia haboua. Vadaeni, tadikaka ese unai gaukara taudia idia haroro henia matamaia bona idia dekenai English gado buka bona magasin idia hariharilaia. Tadikaka be hora tamona lalonai gaukara taudia ibounai idia haroro henidia, unai murinai gaukara taudia be basi dekenai idia guia. Basi ia heau neganai, unai gaukara taudia be buklet 126 bona magasin 329 idia abia!

Edia gaukara ese anina namona ia havaraia dainai, unai ese tadikaka ia hagoadaia wiki vaira ai, sekit tauna ena vadivadi neganai, unai teritori idia karaia lou totona. Daba 6:30 ai, medu ia diho, to sekit naria tauna ese haroro grup ia naria, bona pablisa 24 be unai basi stopu dekenai ia siaidia lao. Idia ese Tagalog gado buka, buklet bona magasin haida idia abia lao, badina guna idia davaria unai gaukara taudia momo be Filipino taudia. Basi ia heau neganai, gaukara taudia ese buka 7, buklet 69, bona magasin 479 idia abia lao. Unai haroro gaukara idia karaia tadikaka taihu idia moale bada!

Unai gaukara taudia be edia tano korikori dekenai idia do giroa lou lasi neganai, tadikaka ese idia haida be edia noho gabuna dekenai idia lou henia, bona Basileia ena sivarai ma haida idia herevalaia. Gaukara taudia haida idia gwau, guna idia be tano ma haida ai Iehova ena Witnes taudia ese idia haroro henidia danu. Unai gaukara taudia ese iseda tadikaka idia tanikiu henia, badina Finland ai idia noho neganai Witnes taudia be dala idia karaia idia vadivadi henidia totona.

Oi hegaegae dala idauna ma ta ai emu teritori ai idia noho taudia oi haroro henidia totona, a? Dala oi karaia tano idauna amo idia mai taudia oi haroro henia totona, a? Bema oibe, reana Turku ai iseda tadikaka taihu ese idia davaria ekspiriens hegeregerena oi davaria diba.

[Map/Picture on page 32]

(For fully formatted text, see publication)

FINLAND

HELSINKI

Turku