Europe Ena Saut Kahanai Ai Haroro

BOUTI amo Crete motumotu ai rakatania bona Mediterranean davarana amo ai heau lao neganai, ai itaia Crete motumotu ena Levká Ororodia be idia maragi idia lao bamona. Bouti dekenai ai guia taudia ibounai be 13, bona ai ura Gavdos motumotu dekenai ai lao haroro totona. Gavdos be Europe ena saut kahanai ia noho motumotu maragina.

Dina ia siahu dainai ai laloa emai laolao be do ia namo. To nega sisina murinai, lai bada ia toa bona hurehure ese bouti ia botaia. Gorere mamina lau abia neganai, aposetolo Paulo ena sivarai Baibel lalonai lau laloa. Lagani handred haida gunanai, Paulo be bouti amo unai davara dekenai ia heau lalonai lai ia toa bona medu bada ia diho. Unai negai Gavdos motumotu idia gwauraia Kauda. (Kara 27:13-17) Lau laloa gauna be Gavdos dekenai ai ginidae namonamo be namo.

Daudau lasi Gavdos motumotu ai itaia, ia be nadi momo gabuna bona ororo haida be davara dekenai. Unai motumotu ena ororo doridia be palaka bona edia lata be mita 300 bamona. Motumotu ena bada be sikoea kilomita 26 bamona, bona ena gabu momo ai pine audia bona au maragidia idia tubu. Motumotu ena gabu haida dekenai, juniper audia be kone badinai idia tubu.

Guna, Gavdos motumotu ai taunimanima 8,000 bamona idia noho, to hari, unai namba ia diho 40 henunai. Toana be Gavdos ai divalopmen be lasi. Ena be kago bona oela udaia bouti be unai motumotu idia hanaia, to bouti ta sibona be Crete amo ia lao Gavdos. To, nega momo weda ia dika dainai unai bouti ia heau lasi o motumotu dekenai ia ginidae haraga lasi.

Gavdos dekenai ai lao badina ai ura unuseniai idia noho taudia dekenai, vaira neganai do ia vara mauri hanaihanai helarona ai herevalaia. Wofu dekenai ai ginidae neganai, ai ura maoromaoro sivarai namona ai harorolaia.

Ai hesiku bada badina hora 4 mai kahana bamona lai bona medu lalonai ai heau. To ai laga-ani sisina bona kofi ai inua murinai emai tauanina ia goada lou. Unai murinai, Baibel amo aposetolo Paulo ena laolao sivaraina ai riviulaia, ai guriguri bena haroro gaukara ai hamatamaia.

Gavdos taudia be heabidae taudia. Edia ruma dekenai ai idia boiria bona ranu bona aniani idia henia. Idia ai haroro henia sibona lasi, to edia heabidae karana dainai idia ai durua gau haida ai hanamoa totona. Hegeregere, emai grup tauna ta be elektrisen, bona hahine ta ia hereva henia lalonai ia itaia unai hahine ena bisinesi gabunai paoa kohuna ta ia dika, bona hahine ia hamaoroa do ia durua ia hanamoa totona. Hahine ia moale bada, bona Baibel buka bona magasin haida ia abia, bona emai gaukara ia hanamoa. Hahine ma ta ia gwau: “Emui gaukara be Dirava amo to taunimanima amo lasi, badina gabu daudau amo umui mai bona inai motumotu dekenai umui haroro.”

Ai abia lao Baibel bukadia be momo ese idia ura henia. Tau ta be Watchtower bona Awake! magasin ia abia, to ia ura ma haida ia abia keru negadiai ia duahia totona. Tau ma ta be Baibel buka bona magasin ia abia, to ia ura ma haida ai siaia ena stoa dekenai ia atoa ena kastoma ese idia duahia totona. Ai dekenai ena adres ia henia, unai amo hua ta ta ai magasin haida ai siaia diba. Famili ta dekenai ai hahedinaraia edia motumotu maragina be Baibel ese ia herevalaia, unai idia itaia neganai idia moale bona emai magasin idia abia danu.

Ena be ai moale badina kamonai taudia momo ai davaria, to grup lalonai haida be guna Gavdos dekenai idia vara gaudia idia laloa neganai idia hebogahisi. Sarakíniko Bay ena badinai ruma ta ia noho, guna unuseniai gavamani ese idia lulua taudia idia hadiburaia. Lagani 1930 bamona lalodiai Iehova ena Witnes tauna ta, Emmanuel Lionoudakis, be ena haroro gaukara dainai unuseniai idia hadiburaia.a Unai negai Gavdos be inai bamona idia gwauraia, “unai motumotu ai gau ta ia noho lasi to doadoa (o scorpion) sibona idia noho, unuseniai taunimanima momo . . . idia hitolo mase, gau momo dekenai idia dabu bona gorere idauidau idia abia, unai dainai idia gwauraia mase taudia edia motumotu.” Emmanuel Lionoudakis sibona be Iehova ena Witnes bona dibura taudia ia haroro henidia, to aniani totona ia haoda danu. Iena natuna, ravana tauna, bona tubuna kekeni be ia noho gabuna idia itaia neganai idia hebogahisi bona idia tai. To iena haheitalai namona ese ai ia hagoadaia, Dirava ai badinaia bona haroro gaukara ai goadalaia totona.

Gavdos ai idia hadiburaia taudia dekenai unai be gabu dikana. To ai dekenai ia be haroro gabuna namona, badina heabidae taudia dekenai magasin 46 bona buklet 9 ai hariharilaia. Ai ura dikadika emai tura matamatadia ai itaia lou.

Ai ura 5 oklok adorahi Gavdos rakatania, to weda ia namo lasi dainai, ai naria ela bona 3 oklok dabai Gavdos ai rakatania. Hora 5 ai be lai bona medu lalonai ai heau ela bona Crete dekenai ai ginidae. Ena be ai hesiku bada bona emai tauanina idia hisihisi, to ai moale badina Iehova ena ladana be Gavdos motumotu dekenai ai harorolaia. (Isaia 42:12) Unai gaukara namona dainai ai ibounai ai moale bada. Momokani, emai laolao be mai ena hekwarahi, to ai davaria ekspiriens namodia do ai laloaboio diba lasi.