Inai Oi Diba, A?

Israela taudia be dina ta ta ena hekwakwanai idia hamaoromaoroa neganai, Mose ena Taravatu lalonai idia noho hakaua herevadia idia badinaia, a?

OIBE, nega haida. Haheitalai ta mani ita laloa. Deuteronomi 24:14, 15 ia gwau: “Oiemu hesiai tauna mai davana, Israela tauna ogogamina o idau bese tauna, . . . Ia ese Lohiabada dekenai do ia tai, oi do ia samania, vadaeni oi be kerere garina.”

Lagani 600 B.C.E. do lasi neganai, unai bamona noinoi herevana ta idia davaria. Unai toretore be Asadodoa siti kahirakahira idia davaria. Ia be uro ena kahana maragimaragi dekenai idia torea, reana uma gabu ai ia gaukara tauna totona. Ia be witi ena metau maorona ia henia lasi dainai, inai hereva idia torea: “Dina haida gunanai, emu hesiai tauna [noinoi tauna] be witi ia haboua murinai, Shobay ena natuna, Hoshayahu, ia mai bona emu hesiai tauna ena dabua ia abia. . . . Dina ena siahu lalonai, lau ida witi idia haboua taudia be egu hereva do idia hamomokania . . . lau gwauraia herevadia be momokani. Lau be kerere ta lau karaia lasi. . . . Bema gavana ia laloa ena hesiai tauna ena dabua do ia siaia giroa lou lasi, mani hebogahisi dainai lau noia gauna ia karaia! Bema emu hesiai tauna ena dabua be lasi, oi hereva be namo.”

Histori torea tauna, Simon Schama, ia gwau, unai noinoi lalonai “hesiai tauna be ia ura [ena dabua] do ia abia lou karana sibona ia herevalaia lasi. Danu, ia hahedinaraia ia noinoi tauna be Baibel ena taravatu ia diba, hegeregere Levitiko bona Deuteronomi ese ogogami taudia kara auka henia karana idia herevalaia.”