Mai Iseda Lalona Ibounai Ida Iehova ena Ura Ita Karaia
1 Hari inai nega dokona lalonai, haroro gaukara idia karaia neganai, iseda tadikaka, taihu, bona natudia be hekwakwanai momo idia davaria. Metau dikadia momo idia davaria bona idia haheaukalaidia be ia auka. Unai dainai, gau badana be kongregesen naria taudia idia gima noho “sibona [idia] naria namonamo, bona mamoe ibounai orea danu.”—Kara 20:28.
2 Elda taudia be edia ‘lalona ibounai ida’ edia gaukara idia naria namonamo totona, gau badana be tadikaka bona taihu edia kara idia itaia namonamo. Unai kara haida be dahaka? Henunai unai kara haida be henanadai dekenai ai torea.
1. Idia haida be hereva momokani bona Iehova ena orea dekena amo idia hure oho matamaia, a?—Heb. 2:1; 12:12, 13.
2. Idia haida be tanobada taudia idia turana henidia bona edia kara idia tohotohoa, a?—Iak. 4:4.
3. Idia haida be inai tanobada ena kohu idia ura henia bada dainai kohu momo idia tahua, a?—1 Ioane 2:15-17.
3 Unai bamona hekwakwanai momo do idia vara lasi bema Kongregesen Buka Stadi naria taudia ese edia grup taudia idia naria namonamo neganai. Buka stadi naria tauna be dala idauidau dekenai iena grup taudia ia durudia diba. Iena grup taudia be edena bamona do ia durudia diba mai edia kudouna ibounai danu Iehova ena hesiai gaukara do idia karaia totona?
4 Gau ginigunana be do ia hadibadia namonamo. Hahediba tauna namona ai do ia lao totona, gau badana be do ia hegaegae namonamo stadi do ia karaia namonamo totona. Stadi naria tauna be henanadai iboudiai edia haere do ia diba be gau badana, to unai sibona lasi, namona be haere edia badina bona idia stadilaia sivaraina ena namo idia dekenai do ia diba danu. Namona be ia ura dikadika grup taudia ia durudia idia stadilaia sivaraina ena anina korikori do idia diba totona, badina unai neganai idia dibaia hereva momokanina idia badinaia diba, bona ma taunimanima haida dekenai idia hahedinaraia diba danu.
5 Buka stadi naria tauna ena mai anina bada gaukarana ma ta be haroro gaukara do ia gunalaia. Unai anina be pura iboudiai iena grup taudia danu do idia lao bona ruma ta ruma ta gaukara idia karaia, bona bema mai dalana ia bamodia lou-henia bona Bible stadi idia karaia neganai. Bema nega haida ia be dala lasi grup ia naria totona, ia ese ma tadikaka ta ia abia hidi grup ia naria bona tadikaka bona taihu be haroro dekenai ia hakaudia totona. Buka stadi naria taudia bona elda taudia ese edia mauri ena kara ibounai lalonai haheitalai namona idia hahedinaraia be gau badana. Bema edia grup taudia idia gunalaia namonamo bona idia durudia namonamo, unai anina be mai edia lalona ibounai danu Iehova ena ura idia karaia.—1 Pet. 5:2, 3.
[Questions]
1. (a) Efeso 6:6 ena sisiba Iehova ena Witness taudia ibounai dekenai be dahaka? (b) Kara 20:28 oi duahia. Dahaka dainai elda taudia be “mamoe” idia naria namonamo be gau badana? Dahaka dainai sibodia idia naria namonamo be gau badana?
2. Tadikaka bona taihu edia kara dekenai dahaka henanadai ita gwauraia diba?
3, 4. (a) Buka stadi naria tauna ena grup taudia ese ia do idia matauraia totona, ia dekenai 1 Timoteo 5:17 ena sisiba herevana be dahaka? Bona Roma 12:8 ena sisiba be dahaka? (b) Stadi naria tauna be ena hahediba gaukarana ia goadalaia noho neganai, iena ura badana be dahaka?
5. (a) Bema stadi naria tauna ese haroro gaukara ia gunalaia, unai ese pablisa taudia edena bamona ia durudia? (b) Petero Ginigunana 5:2, 3 ena hereva hegeregerena, gaukara naria taudia be edia gaukara edena bamona idia laloa be namo? (c) Korinto Ginigunana 15:58 ia gwau edia gaukara idia naria namonamo taudia be daika ena ura idia karaia?
This article is unique to PNG.