Kahana 2: “Mauri Namona Idia Ura Henia Taudia” Distrik Hebouhebouna Ena Hadibaia Herevadia Haida
BAPATISO: Namona be Saturday daba ena program ia do kehoa lasi neganai, idia bapatiso gwauraia taudia be edia gabu korikori dekenai idia helai hegaegae. Idia ura bapatiso taudia ta ta iboudiai ese sibodia edia digudigu dabua bona tauele idia mailaia be namo. Haroro tauna ese bapatiso herevana bona guriguri ia henia murinai, seamani ese sisiba hereva haida be bapatiso abia gwauraia taudia dekenai do ia henia bona ane ena namba do ia gwauraia. Ane ena kahana ginigabena idia abia matamaia neganai, attendant taudia ese bapatiso abia gwauraia taudia do idia hakaudia lao bapatiso gabuna dekenai eiava unai gabu do idia lao henia taraka dekenai. Unai nega lalonai, helai taudia ma iboudiai ese ane do idia abia haorea.
VOLANTIA GAUKARA: Distrik hebouhebou do ia heau namonamo totona, volantia taudia idia heduru be gau badana. Reana oi be hebouhebou ena nega ibounai lasi to nega haida sibona dekenai volantia gaukara oi karaia diba, to herevana, emu gaukara do ia heduru bada. Bema oi heduru diba, hebouhebou gabuna dekenai oi ginidae neganai, Volantia Gaukara Department dekenai oi lao. Lagani 16 idia do davaria lasi memero bona kekeni ese volantia gaukara idia karaia diba danu, to gau tamona be inai: Bema edia tamana eiava sinana eiava taunimanima badana ta danu idia gaukara hebou lasi, volantia gaukara idia karaia diba lasi.
LAPEL KADI: Oi be distrik hebouhebou gabuna dekenai oi noho neganai bona unai gabu oi lao henia eiava oi rakatania neganai, mani unai lapel kadi oi atoa. Nega momo dala ai ita laolao neganai, witness gaukara namona ita karaia diba. Lapel kadi be emu kongregesen amo oi abia be namo, badina distrik hebouhebou dekenai do oi abia diba lasi.
OI NARIA NAMONAMO: Herevana edeseniai emu motuka oi pakaia, to namona be nega ibounai oi lokaia, bona emu kohu be emu motuka lalonai oi atoa hedinarai lasi. Bema mai dalana, namona be emu kohu ibounai be motuka ena murina kahana dekenai oi hunia bena oi lokaia. Henaohenao taudia dainai oi naria namonamo. Idia be taunimanima hutuma edia huanai idia loaloa. Unai hereva ena anina be distrik hebouhebou gabunai emu kohu namona be emu helai gauna latanai oi rakatania lasi. Mani oi naria namonamo!
This article has been partly taken from km-E 5/91 “Arrange Now to Attend the 1991 ‘Lovers of Freedom’ District Convention,” box on p. 6. Part 1 is in km 11/91.