Haroro Gaukara Idia Goadalaia
1 Iseda ladana, Iehova ena Witness, ese ia hahedinaraia ita be daidia bona iseda gaukara be dahaka. Ita be iseda Dirava, Iehova, ena hereadae karadia ita harorolaia. (Isa. 43:10, 12) Kongregesen ena memba ta ai do ita lao totona, ita ta ta ibounai be haroro gaukara ita karaia be gau badana. Taunimanima dekenai ita haroro dala badadia be, ruma ta ruma ta dekenai ita lao, dala dekenai ita gini, taunimanima ita lou henidia, bona Baibel stadi ita karadia. Ita ibounai idia hagoadaia unai gaukara do ita karaia badabada be maoro.—1 Kor. 15:58.
2 To, kongregesen ena memba taudia haida be hora momo idia haroro diba lasi. Reana idia gorere bada eiava ma gau ta dainai idia loaloa momo diba lasi. Reana edia varavara taudia edia dagedage dainai hekwakwanai bada idia vara. Reana mero o kekeni ena tama o sina be Witness lasi dainai idia koua momo. Reana haida be gabu daudau dekenai idia noho, bona idia be motuka lasi dainai idia laloa idia haroro be dala lasi. Reana haida be hemarai momo taudia dainai haroro totona idia gari. Pablisa taudia dekenai unai bamona ia vara neganai, reana idia laloa Keristen ena kara idia badinaia namonamo lasi, badina idia itaia haida be hora momo lalodiai idia haroro diba, bona ena be idia ura unai idia karaia, to idia be dala lasi. Namo lasi unai taudia ese edia haroro gaukara idia gwauraia gau maragina. (Gal. 6:4) Herevana edia noho be edena bamona, namona be idia diba, bema mai edia lalona ibounai ida haroro gaukara idia karaia, Iehova be edia hekwarahi dainai do ia moale.—Luka 21:1-4.
3 Dala Idia Tahua Idia Haroro Totona: Ekspiriens tausen momo ese idia hahedinaraia, ena be hekwakwanai badadia idia davaria to unai ese ia koudia lasi, idia haroro noho. Idia laloa namonamo, bona nega idauidau bona gabu idauidau dekenai haroro gaukara idia karaia. Idia loaloa lasi, to edia ruma sibona dekenai idia noho taudia ese telefon idia gaukaralaia idia haroro totona. Ruma dekenai idia mai taudia iboudiai idia haroro henidia. Bema hahine ena ruma bese taudia be Witness taudia lasi, reana ena ruma dekenai ia haroro diba lasi, to dala ia kehoa neganai, dekena taudia eiava ia davaria taudia ma haida ia haroro henidia diba.
4 Witness lasi tama o sina be reana ena natuna dekenai taravatu ia atoa ruma ta ruma ta dekenai haroro gaukara do ia karaia lasi totona. Namo lasi ia laloa unai be ia hanaia diba lasi hekwakwanai ta, namona be ena klas natudia bona tisa taudia be ena “teritori” ai ia halaoa, unuseniai haroro gaukara namona bona reana Baibel stadi ia karaia diba. Gabu daudau dekenai idia noho taudia momo be revareva torea karana amo idia haroro. Keristen ena dala idia goadalaia taudia ese dala do idia davaria idia haroro totona, bona ‘Iesu Keriso iseda Lohiabada idia diba dainai, idia noho kava lasi.’—2 Pet. 1:8.
5 Iehova ese hora hida do ita haroro ia gwauraia lasi, to ia gwau namona be ita ibounai be mai iseda “kudouna ibounai” ida ita karaia. (Kol. 3:23) Ena be hora hida ita haroro, bona ita havaraia huahua ena bada be idauidau, to ita ibounai ita karaia ena badina be tamona—lalokau dainai iseda “lalona ibounai” ida ita karaia. (1 Sis. 28:9; 1 Kor. 16:14) Ena be hora momo ita haroro diba lasi, to bema iseda goada ibounai ida ita gaukara, namo lasi ita laloa iseda abidadama ia manoka eiava kongregesen ita durua bada lasi. Paulo bamona, mai momokani danu do ita gwau diba ‘taunimanima vairanai haroro bona hadibaia hereva ta lau hunia lasi.’—Kara 20:20.
[Questions]
1. Iseda ladana, Iehova ena Witness, ese ia hahedinaraia ita be dahaka gaukara ita karaia?
2. (a) Dahaka gaudia dainai hora momo haroro dekenai ita gaukara diba lasi? (b) Bema pablisa haida be hora momo idia haroro diba lasi neganai, dahaka idia laloa be namo?
3. Sivarai namona ita harorolaia lasi garina, hekwakwanai ita hanaia daladia haida be dahaka?
4. Bema Witness lasi tama o sina be ena natuna dekenai taravatu ia atoa ruma ta ruma ta dekenai do ia haroro lasi totona neganai, haroro gaukara be edeseniai do ia karaia diba?
5. (a) Sivarai namona ita harorolaia neganai, ita ibounai be edena bamona ita karaia be namo? (b) Ena be hora momo ita haroro diba lasi, to dahaka dainai ia namo lasi ita laloa unai be heduru bada lasi?