Hebouhebou Program Matamatadia
1 Lagani 1995 sekit hebouhebou program ena sinado be “Umui Noga Noho, Gini Auka, Umui Goada.” Korinto Ginigunana 16:13 ai, aposetolo Paulo ena hagoadaia hereva Keristen taudia ginigunadia dekena amo unai sinado idia abia.
2 Program ena matamaia kahana ese ita sibona ita nanadaia bema lauma dala dekenai ita do gini goada noho karana do ia hahedinaraia. “Nega dokonai” gini goada karana ita karaia totona ena anina be Iehova bona ena orea ita tabekau henia momokani. (2 Tim. 3:1) Ita do idia hadibaia lou Dirava ese iseda gaukara namodia ia laloa bada. Iseda Keristen karadia bona kara namodia ita hanamoa daladia do idia hadibadia.
3 Lauma dalanai ita goada noho neganai bona maduna o gaukara ita abia kongregesen lalonai, namona be iseda haroro gaukara ita goadalaia noho danu. Hereva haida bona haheitalai amo edena bamona ita bona iseda ruma bese be hanaihanai lauma aniani ita ania diba do idia herevalaia.
4 Saturday dabai bapatiso gwauraia taudia be taunimanima vairadia, ranu lalonai, edia gwauhamata do idia hagugurua diba. Bena Sunday ai, ita ibounai ese hereva badana “Dirava Vairanai Oiemu Gini be Edena Bamona?” do ita kamonai henia.
5 Program ena kahana ginigabena ese ita do ia hagoadaia abidadama dekenai ita gini goada bona mai lalokau bona mai maino ida ita kara heheni. Sekit hebouhebou be Iehova ena dala ta ‘iseda ekalesia varavara taudia edia lalona do ita hagoadaia’ totona. (Heb. 10:24, 25) Namona be oi palani namonamo bena dina rua ena program ibounai oi kamonai diba.
6 Lagani 1995 dina tamona hebouhebou ena sinado be “Hereva Momokani Harorolaia Noho.” Hebouhebou ena program ibounai ese Iesu ena haheitalai namona bona hanaihanai, dala ia noho neganai, hereva momokani ia harorolaia karana, do ia herevalaia momo. Unai hebouhebou be iseda maduna, Iesu murinai ita raka bona iena kara namona ita tohotohoa maduna unai, do ia hahedinaraia goevagoeva.—1 Kor. 11:1.
7 Hebouhebou ese edena bamona kongregesen be hereva momokani ia abia isi diba do ia kikilaia danu. Danu, iseda magasin bona buka gaukaralaia namonamo dalana do ia hahedinaraia.
8 Vadivadi tadikaka ese hereva badana do ia henia bona ena sinado be: “Hereva Momokani Harorolaia Karana—Dahaka ia Havaraia.” (Ioa. 8:32) Unai dina tamona hebouhebou ese ‘hereva momokani lalonai ita gini goada noho’ totona heduru herevadia ita ibounai do ia henia momokani.—2 Pet. 1:12; 1 Kor. 15:58.
This article is unique to PNG.