Mauri Ia Henia Makaia Gaukarana
1 Iehova ese hahemaoro maoromaoro ia do henidia lasi neganai, Ia ese taunimanima ia hamaoroa guna bona manau taudia dekenai hamauria dalana ia karaia. Esekiela ena nega ai, taunimanima haida ese kara dika idia taitailaia bona lalohisihisilaia. Iehova ese haida ia siaia unai bamona kara namo taudia idia makaia idia roho mauri totona. (Esek. 9:4-6) Iseda haroro gaukara be unai hamauria gaukara bamona. Dala badana ai ita durua diba.
2 Kudou namo taudia davaria be gau ginigunana sibona. Lou henia ita hegaegaelaia. Vadivadi ginigunana murinai, lou henia totona, dahaka ita kikilaia bona dahaka buka ita rakatania ita torea. Lou henia namona do ia vara bema dahaka do ita gwauraia ita hegaegaelaia namonamo guna.
3 “Gima Kohorona” ita hariharilaia murinai, ita lou henia neganai, hereva kwarana ita gaukaralaia:
◼ “Mani Gima Kohorona ena rau ginigunana ai ia noho herevana oi itaia, ia gwau, ‘Iehova Ena Basileia Ia Harorolaia.’ Inai magasin be idau badina inai tanobada ena hekwakwanai iboudiai hanamoa dalana tamona, Dirava ena Basileia, ia abia isi. Dirava ena Basileia ese do ia havaraia gaudia bona Dirava ena ura tanobada dekenai ia hahedinaraia. Iesu ia gwau unai sivarai namona be tanobada ibounai dekenai do idia harorolaia.” Mataio 24:14 duahia, bona Gima Kohorona abia hanaihanai bona idia sibona ese Baibel stadilaia totona idia gaukaralaia daladia oi hahedinaraia.
4 Reana oi ura Baibel sibona oi hahedinaraia bona duahia hanaihanai karana oi kikilaia. Inai bamona oi gwau diba:
◼ “Kahirakahira taunimanima iboudiai ese mauri ena hekwakwanai idia haheaukalaidia diba sisiba idia ura abia. Edeseniai oi laloa ita abia dae momokani diba sisibana ita davaria diba? [Haere naria.] Taunimanima momo ese turadia edia sisiba idia tahua o moni bada idia negea doketa edia sisiba idia abia totona, to moale idia davaria lasi. To, ma taunimanima milioni momo be Baibel sibona ena sisiba idia abia dae bona abidadama henia. Baibel ese iseda hekwakwanai iboudiai edia hanaia daladia ia hadibaia.” 2 Timoteo 3:16, 17 duahia. Bena Mauri Hanaihanai bukana, rau 247 oi kehoa, bona unuseniai edena bamona lalokau ese iseda ruma bese ena hekwakwanai ia hanamoa diba oi hahedinaraia.
5 Reana “Mauri Hanaihanai Paradaiso Lalonai” bukana oi abia hidi Baibel stadi hamatamaia totona, bona inai hamatamaia hereva oi gaukaralaia:
◼ “Iseda ruma bese taudia ita lalokau henia bona ita ura mauri namona idia abia. Edena bamona mauri do idia abia bema inai bamona tanobada dekenai idia noho?” Rau 156-7 ena laulau hahedinaraia. Unai rau dekenai idia noho Baibel siridia amo ta o rua duahia, bona hahedinaraia ia koikoi diba lasi Diravana Iehova ese unai gwauhamata idauidau ia henia. Rau 5-6 edia karoa ena lista oi hedinaraia bona ia oi nanadaia edena karoa ia ura kikilaia; ia ura karoana dekenai oi lao, bona paragraf ta o rua umui kikilaia.
6 Ma tau ta be unai hamauria maka ia abia totona, oi ura ia oi durua, a? Kwalimu dalana be ‘nega ibounai hesiai gaukara do ita karaia namonamo,’ anina be ita hegaegae bona kamonai taudia iboudiai ita lou henia.—2 Tim. 4:5.