Haroro Sikuli amo Hahenamo Abia Daladia
1 Haroro Sikuli ese ita ia durua bada ‘hadibaia dalana’ ita dibaia totona, bena Baibel ena hereva momokani be taunimanima dekenai ita harorolaia namonamo diba. (2 Tim. 4:2) Pura ta ta iboudiai, Baibel herevadia idauidau ita kamonai bona edia anina ita lalo-pararalaia. Unai sikuli ena mai anina bada herevadia amo edia hahenamo abia guguru daladia be dahaka?
2 Haroro Sikuli naria tauna ena hamatamaia herevadia oi hakala henia namonamo, badina ia ese unai hebou lalonai do ita kamonai hereva namodia haida do ia gwauraia hedinarai. Bema henanadai haida ia gwauraia, haroro gaukara dekenai edia haere edena bamona do oi gaukaralaia diba dalana oi lalohadailaia be namo.
3 Hereva Namba 1 be buka ta ena hereva riviulaia herevana sibona lasi. Unai hereva badinaia dalana bona oi ia durua diba dalana ia hahedinaraia. Bema oi hegaegae guna, unai hereva badadia do oi laloa namonamo diba, bona henanadai do ia gwauraia neganai, haere do oi henia diba.
4 Bema pura ta ta edia sediual hegeregerena Baibel oi duahia, unai ese Dirava ena Hereva laloa bada karana do ia habadaia. Stadi karana amo hereva matamatadia idauidau momo do oi davaria bona unai ese emu lalo-parara hereva momokani dekenai do ia habadaia. Baibel duahiduahi ena hereva badadia ia gwauraia tauna ese Baibel ena sivarai ia herevalaia lou sibona lasi. Ia ese unai siri edia anina bada gaudia do ia riviulaia sisina murinai, karoa edia hereva badadia do ia gwauraia hedinarai, bona edia anina iseda mauri bona tomadiho dekenai do ia hahedinaraia. Oi kamonai namonamo bena Baibel ena sisiba badinaia namonamo dalana do oi dibaia.—Sal. 119:105.
5 Bema oi dekenai hereva ta idia henia, namona be guna oi idia henia sisiba herevana oi laloa. Haroro School ena Buka ena sisiba herevana, emu manoka karana ia sisibalaia herevana oi duahia, bona unai hereva oi badinaia toho. Emu hereva oi hegaegaelaia neganai, namona be haroro gaukara lalonai oi gaukaralaia diba herevadia oi tahua.—sg-MO rau 22-24.
6 Bema oi be taihu ta bona Hereva Namba 3 eiava Hereva Namba 4 oi idia henia, namona be haroro gaukara dekenai ia vara diba gauna hegeregerena oi karaia. Reana ruma tauna be emu hereva haida ia ura eiava ia ura lasi; ta be Baibel ena hereva do ia laloa namonamo totona do oi durua dalana oi hahedinaraia be namo. (sg-E rau 153-8) Unai ese helai taudia ia durua, badina haroro gaukara dekenai bema ta ia gwau ia ura lasi, hanaia daladia idia dibaia. Emu hereva oi hegaegaelaia namonamo guna, bona emu durua tauna ida do umui karaia toho guna negana oi gwauraia. Namo lasi hebou ia heau noho lalonai unai hereva umui karaia toho.
7 Namona be hereva idia henia gwauraia taudia be platfom kahirakahira dekenai idia helai. Platfom dekenai idia lao haraga diba bona sikuli naria tauna be sisiba ia henia neganai, ia vaira henidia diba. Sikuli naria tauna ese Haroro School ena Buka amo mai ena hebogahisi ida sisiba ia henia neganai, helai taudia iboudiai ese namo do idia davaria. Sisiba ia henia neganai, reana Haroro Sisiba pepana ena namba idia torea bamona do ia karaia lasi; to emu hereva henia dalana hanamoa totona, emu manoka gabudia do ia laloa guna.
8 Pura ta ta ai Haroro Sikuli totona ita hegaegae bona ita lao henia badina namodia be unai. Unai hahediba ese ita do ia durua, mai eda aonega bona mai eda diba ida hesiai gaukara do ita karaia namonamo totona.—Aon. 1:5.
This is a repeat of article in km 5/94 taken from km-E 5/94 “Benefiting Fully From the Theocratic Ministry School.”