“Dina Ibounai” Iehova Hanamoa
1 Salamo 145:2 ai King Davida ena gwauhamata Iehova dekenai ia noho: “Dina ibounai lau ese oi do lau tanikiu henia, ma oi do lau hanamoa ela bona hanaihanai.” Ita danu ese iseda guba Tamana ita hanamoa be namo! To ita be Davida ena haheitalai, “dina ibounai” Iehova ena lohia siahuna ia abia isi karana, be edena bamona ita tohotohoa diba?
2 Iseda Lalona be Iehova Laloa Bada Lalohadai amo Ita Hahonua: Dirava ena Hereva stadilaia loulou karana amo Iehova ese ia karaia vadaeni, ia karaia noho, bona do ia karaia gaudia do ita laloa bada mai eda lalona ibounai ida. Iena kara namodia ita laloa bada noho neganai, iena namo do ita ura dikadika ita kikilaia. (Sal. 145:7) Nega namodia ibounai dekenai mai eda ura ida Iehova do ita hanamoa.
3 Dina Ta Ta ai Emu Herevahereva ai Iehova Hanamoa: Dina ta ta ai iseda dekena taudia, sikuli taudia, gaukara taudia, bona ita davaria taudia ma haida ida ita herevahereva neganai, reana dala do ia kehoa iseda helaro ita herevalaia. Reana iseda dekena tauna ese iseda gabu dekenai ia vara raskol karana ia lalo-hekwarahilaia; sikuli mero o kekeni ese drag ania kava karana eiava sihari kava karana ia lalo-hekwarahilaia; gaukara tauna ese ena lalohadai gavamani dekenai ia herevalaia. Ita ese Dirava ena Hereva lalonai idia noho hakaua herevadia bona gwauhamata, unai hekwakwanai hanaia bona gabeai do ia hanamoa daladia, ita hahedinaraia. Unai bamona herevadia be “nega korikori” ai ita gwauraia neganai, namo idia havaraia diba!—Aon. 15:23.
4 Nega Ibounai Iehova Herevalaia: Iehova ia laloa bada tauna ia ura taunimanima momo dekenai sivarai namona ia herevalaia. (Sal. 40:8-10) Inai henanadai ita sibona ita haerelaia be namo, ‘Egu goada hegeregerena lau karaia diba gaudia iboudiai lau karaia, a?’ Momo idia davaria bema edia nega idia gaukaralaia namonamo, regula painia taudia ai idia lao diba. Bema hari oi hegeregere lasi unai oi karaia totona, oi be heduru painia gaukara oi karaia diba, a? Memorial negana be gaukara habadaia negana dainai, March bona April be nega namona iseda haroro gaukara ita habadaia, heduru painia gaukarana ita karaia amo.
5 Baibel Stadi Taudia Ita Hagoadaia Ita ida Iehova Idia Hanamoa: Iesu ena mase laloatao hebouna ita karaia neganai, dahaka dainai Iehova ita tanikiu henia bona Iena ladana ita hanamoa be namo, ita laloa lou. Unai be nega namona Baibel idia stadilaia taudia ita hagoadaia ita ida Iehova ena lohia siahuna harorolaia gaukarana idia karaia totona. Namona be idia oi hagoadaia Diba ese Mauri Dekenai Ita Ia Hakaua Lao bukana, rau 173-5, paragraf 7-9 idia laloa bona gurigurilaia. Bema idia hegeregere, namo lasi idia lao lasi haroro badina idia manada lasi dainai. Idia manada pablisa taudia ese idia dekenai Basileia harorolaia gaukara karaia dalana idia hadibaia diba. Bema matamata taudia be mai gari lasi ida sivarai namona idia kikilaia, namona be idia diba Iehova ese idia do ia durua.—Kara 4:31; 1 Tes. 2:2.
6 Noho hanaihanai hahenamodia do ita abia bona ma haida ese do idia abia danu, bema dina ibounai Iehova hanamoa karana ita tahua.