Mai Anina Bada Haroro Heboudia
1 Luka 10:1-11 dekenai ia hedinarai, Iesu be hahediba taudia matamatadia 70 ida ia hebou bona idia ia durua haroro gaukara totona idia hegaegae. Heduru herevadia ia henia, gaukara do idia hegaegaelaia, dahaka do idia hereva, bona hekwakwanai idia vara neganai dahaka do idia karaia totona. Unai sivarai ita laloa neganai ita ia durua.
2 Toana be hahediba taudia 70 iboudiai be Iesu ida unai hebou lalonai idia noho. Haroro hebou dekenai, bema hanaihanai haida be idia leiti, nega bada ia ore kava. Idia ginidae leiti dainai, edena motuka dekenai do idia guia bona edena grup ida do idia gaukara be idia hegaegaelaia lou. Unai dainai, nega momo grup ibounai be idia lao haraga lasi. Ita ibounai ita durua diba bema ita ginidae haraga bona karaharaga teritori dekenai ita lao.
3 Iesu ese ena grup dekenai kiki herevana ta ia henia idia gaukaralaia totona, unai be “Dirava ena Basileia.” (Luka 10:9) Ita danu ese unai sivarai harorolaia gaukarana ita abia, bona herevalaia dalana dekenai heduru herevadia ita moalelaia be namo. Reana hebou naria tauna be Herevalaia bukana ia kikilaia, ia lalonai nega idauidau ai ita gaukaralaia diba hamatamaia herevadia 40 bamona bona Baibel siri namodia idia hedinarai. Unai hamatamaia hereva tamona eiava rua be hereva kwadogi amo ia gwauraia neganai, unai ese ita ia durua iseda lalona dekenai hereva daladia idia noho, bona iduara dekenai mai gari lasi ida taunimanima ita hereva henia diba.
4 Iesu ese ena hahediba taudia dekenai dahaka do idia gwauraia ia hadibadia sibona lasi, to do idia herevalaia dalana ia hadibadia danu. (Luka 10:5, 6) Hesiai Hebou ena program dekenai, do ita haroro namonamo daladia idia hahedinaraia. Reana haroro hebou ia naria tauna ese hesiai hebou gunana dekenai idia hahedinaraia herevana ta do ia herevalaia lou bona unai dina ai haroro gaukara lalonai do idia gaukaralaia dalana ia hahedinaraia. Idia hegaegaelaia Baibel kiki kwadogina idia haheitalaia bona unai ese ita ia durua lalohadai haida ita laloatao bona herevalaia dalana ita diba.
5 Iesu ese edia kara dekenai ena hahediba taudia ia hadibaia danu. (Luka 10:7, 8) Unai hegeregerena, reana hebou naria tauna ese ita dekenai heduru hereva do ia henia iseda haroro gaukara ia hadikaia gauna amo ita raka siri totona. Reana sisiba ia henia ita momo be dala dekenai ita gini hebou lasi totona, eiava kamonai lasi taudia ida ita hepapahuahu lasi totona. Reana ita do ia hadibaia lou namona be ruma-ta-ruma-ta rekodi pepana ita torea namonamo. Reana tama bona sina do ia hamaoroa edia natudia idia naria namonamo.
6 Hahediba taudia 70 be Iesu ena heduru hereva idia badinaia bona murinai “idia giroa lou, mai moale danu.” (Luka 10:17) Haroro hebou neganai, bema ita idia henia heduru herevadia ita badinaia, Basileia ena sivarai harorolaia gaukarana amo iseda moale do ita habadaia.—Kara 13:48, 49, 52.
This is a repeat of article in km 6/94 taken from km-E 6/94 “Meaningful Meetings for Field Service.”