Taunimanima Idauidau ese Mauri Do Idia Davaria
1 Iehova ia ura “taunimanima ibounai [“idauidau,” NW] ese mauri do idia davaria, bona hereva momokani do idia diba.” (1 Tim. 2:4) Ena be taunimanima edia vara negana ena tauanina oromana, edia mauri lalonai idia vara gaudia, bona edia noho gabuna ese edia kara idia biagua, to idia be mai edia ura kwalimu bona idia ta ta be edia mauri gaukaralaia dalana idia abia hidi diba. Kara namo idia karaia diba bona do idia mauri, eiava kara dika idia karaia diba bona do idia mase. (Mat. 7:13, 14) Unai ita lalo-pararalaia dainai, iseda lalohadai be edena bamona Basileia ena sivarai namona ita harorolaia taudia dekenai?
2 Namo lasi ita laloa ta ena bese eiava ena sene karadia eiava ena dagi dainai hereva momokani do ia kamonai o do ia kamonai lasi. Hereva momokani ese edukeisini sisina eiava edukeisini bada idia abia taudia, politikol karadia idia karaia taudia, bona diba momo taudia, Dirava ia noho lasi lalohadaina idia abia dae taudia, Dirava ia noho eiava ia noho lasi idia daradaralaia taudia, bona kara dika momokani taudia danu ia veria diba. Kara idauidau taudia bona mauri dala idauidau taudia ese edia kara gunadia idia haidaua bona Dirava ena tanobada matamata dekenai do idia abia maurina idia naria noho. (Aon. 11:19) Unai dainai, namona be edia mauri daladia idauidau taudia dekenai mai gari lasi ida Basileia ena sivarai ita harorolaia.
3 Mani Inai Haheitalai Oi Lalodia: Tau ta ese palani ia karaia ena ubua tamana do ia hamasea to ia karaia lasi. Gabeai ia laloa sibona do ia hamasea to ia hegeregere lasi. Henaohenao bona drag hoihoilaia karana dainai dibura dekenai idia atoa murinai, ena headava ia dika. Hari unai tau ia gaukara, headava namona ia moalelaia, bona ena ubua tamana be iena turana korikorina. Dahaka ese ena mauri ia haidaua? Ia be Iehova ena Witness taudia ida Baibel ia stadilaia bona unai amo ia diba gaudia ia badinaia. Iehova be ena kara dika gwauatao lasi lalohadaina ia abia lasi.
4 Hahine matamata ta be televisen dekenai drama ia gadara dainai taunimanima momo ese ia idia diba to unai amo moale ia davaria lasi. To Witness taudia edia kara namo ia itaia murinai, ia ese Baibel stadi ia abia, bona daudau lasi murinai ma haida ia durua Basileia ena sivarai namona idia diba totona. Ruma-ta-ruma-ta gaukarana ia karaia gabudia ibounai taunimanima ese ia idia diba, to mai moale ida ia gwau ia ura taunimanima idia diba ia be Iehova ena Witness ta, ia be drama gadara hahinena idia diba be anina lasi.
5 Witness ta ese Gima Kohorona sabskripsen ia abia hahinena ida Baibel stadi dalana ia herevalaia neganai, dekena hahinena ta be unai ia kamonai bona stadi lalonai ia vareai. Unai dekena hahinena ia lalo-parara guna ia tahua noho hereva momokanina ia davaria vadaeni! Ia bona ena adavana be headava hadokoa pepana idia sainia to idia dadaraia bona maino idia karaia. Ia ese hisiu edia toana edia anina ia tahua goadagoada bona babalau oreana ta ia bamoa, to mai ena ura ida demoni tomadiho ena davana bada bukadia bona ma babalau gaudia ibounai ia negea. Daudau lasi murinai hebou dekenai ia lao matamaia bona ena varavara bona turadia dekenai ena tomadiho matamatana ia herevalaia. Hari mai ena ura ida ma haida dekenai ia haroro noho.
6 Namo lasi tau ta ita do hereva henia lasi neganai ita laloa do ia kamonai lasi. To, namona be mai eda goada ida gabu ibounai idia noho taudia dekenai sivarai namona ita harorolaia. Badina namona dainai ita diba Iehova, “kudouna ia itaia” Diravana, be “taunimanima ibounai edia Hamauria Tauna” ai do ia lao.—1 Sam. 16:7; 1 Tim. 4:10.