Dahaka Dainai Idia Karaia?

¹ Guna idia peroveta Keriso ese ‘Dirava ena ruma do ia ura henia dikadika.’ (Sal. 69:9) Iesu ese Iehova ena tomadiho momokanina ia ura henia dainai ena hesiai gaukara ia atoa guna. (Luka 4:​43; Ioa. 18:37) Unai hereva momokani gwauraia hedinarai urana, be hari Iehova ena Witness taudia edia hesiai gaukarana lalonai ia hedinarai. Hesiai laganina gunanai, tanobada hegegemadai hua ta ta ai painia gaukarana idia karaia taudia edia averes be 645,509. Iseda gwauhamatana Dirava dekenai dainai, namona be ita ta ta be mai guriguri ida ita laloa namonamo bema iseda noho dalana ita haidaua diba bena heduru painia eiava regula painia gaukara do ita karaia.​—Sal. 110:3; Had. 12:1; Roma 12:1.

² Kohu mataganigani henia tanobadana dekenai ita noho dainai, tanobada taudia momo idia lalo-parara lasi dahaka dainai tau ta be ia gaukara goada moni eiava ladana bada lasi hesiai gaukarana lalonai. Dahaka dainai painia taudia ese unai idia karaia? Idia diba idia be hamauria gaukarana idia karaia. Edia lalokau bada Iehova bona edia dekena taudia dekenai ese ia doridia goadagoada ma haida hamauria gaukarana idia durua totona. (Roma 1:​14-​16; 1 Tim. 2:4; 4:​16) Painia tau mai ena hahine ida ese unai idia gwauraia namo herea, idia gwau: “Dahaka dainai ai painia noho? Painia gaukara ai karaia diba lasi ena badina namona ta be Iehova dekenai ai henia diba, a?”

³ Taihu ma ta ese ena lalona ia hadaia painia gaukara ia hamatamaia totona ia gwau: “Egu adavana bona lau be palani ai karaia, ai ta ese ia abia monina ese ai do ia naria diba, anina be mai anina lasi gaudia dekenai emai moni ai haorea kava lasi. To, Iehova ese ai ia hanamoa bada bona ai ia rakatania lasi, ai dabu lasi. . . . Lau be mauri ena badina namona ta lau davaria​—lau be dabu taudia lau durudia bena idia diba Iehova, Dirava momokanina, be ia idia tahua taudia edia amo ia noho daudau lasi.” Nega be ia kwadogi dainai, painia taudia idia laloa mauri durua gaudia sibona be hegeregere bona noho hanaihanai lauma gaudia idia tahua goadagoada noho.​—1 Tim. 6:​8, 18, 19.

⁴ Bema emu mauri ia hegeregere, mani tanobada hegegemadai idia noho painia tadikaka bona taihu handred tausen momo oi bamoa painia gaukarana lalonai. Unai amo idia abia moalena do oi abia diba danu.