Haida Hadibaia Namo Idia Davaria Totona
1 Iehova ia ura taunimanima ibounai be namo do idia davaria. (Isa. 48:17) Ia diba dahaka ese ita dekenai moale korikorina ia mailaia. Iena ura badana be taunimanima ese hisihisi do idia abia lasi bona mauri do idia moalelaia iena hahegani badinaia karana amo. Ita ese namo bada ita davaria bema Dirava ena dala hegeregerena ai ita noho. (Sal. 34:8) Edena bamona ma haida ita hadibaia diba, unai bamona do idia karaia totona?
2 Taunimanima be Dahaka Idia Ura? Oi noho gabuna ai taunimanima be dahaka idia laloa momo? Unai be edia ruma bese ena namo, edia headava ena goada, edia natudia edia vaira negana, bona unai bamona gaudia, ani? Hekwakwanai idia davaria neganai, edeseniai idia lao heduru idia abia totona? Reana idia sibona, sibona durua program, o haida edia heduru dekenai idia tabekau. Unai idia karaia lalonai, idia momo idia daradara, badina namo havaraia totona taunimanima edia lalohadai be idauidau bona idia durua momokani lasi. Namona be idia ita durua bena do idia abia dae Dirava ena Hereva ese ia henia heduru be namo herea. (Sal. 119:98) Unai ita karaia dalana be idia dekenai ita hahedinaraia edia mauri be harihari idia hanamoa diba bema idia hekwarahi, Baibel idia stadilaia bona ia gwauraia gaudia idia badinaia totona.—2 Tim. 3:16, 17.
3 Ia Namo Ia Lao Ruma Bese Maurina: Taunimanima haida sibona idia lalo-parara edena bamona Dirava ena lauma amo ia vara sisibana Efeso 5:22–6:4 ai, be ia namo ruma bese edia hekwakwanai hamaoromaoroa totona. Unai be tau ta bona ena adavana dekenai ia vara, lagani 10 idia headava murinai idia laloa do idia parara. To, unai hahine dekenai Baibel stadi idia hamatamaia bona Baibel ena hakaua herevadia headava maurina dekenai idia hadibaia. Daudau lasi ena tau ese ia itaia hahine be ena mauri ia haidaua Baibel ena hakaua herevadia ia badinaia dainai, bena ia danu be stadi lalonai ia vareai. Gabeai ia gwau: “Hari ai be ruma bese ia moale momokani ena badina ai davaria.”
4 Mauri Ena Anina Korikorina: Drag ania kava karana ia manadalaia matamata merona ta be Witness taudia amo heduru ia tahua neganai, ia idia hadibaia Iehova ese ia laloa bada. Ia gwau: ‘Lau dibaia Havaraia Tauna be mai ena ura taunimanima totona bona ia lalo-namo henia taudia dekenai mauri hanaihanai do ia henia. Unai gauna dainai egu moale be oi laloa diba lasi. Hari be tauanina goadana, lalo-maino, bona Dirava ida hetura karana namona lau moalelaia.’
5 Taunimanima ibounai be Dirava ena Hereva lalonai idia davaria heduru korikorina amo namo idia abia diba. Baibel be ita ia hakaua gauna bamona ita gaukaralaia karana amo ita diba momokani, Iehova ena dala ese tanobada ena dala ia hereaia. (Sal. 116:12) Iseda hahenamo be unai hereva be ma haida dekenai ita halasia bona idia ita hadibaia namo idia davaria totona. Unai ita karaia lalonai, anina namodia momo do ita itaia.