Emu Hesiai Gaukara Oi Habadaia Daladia
1 Lagani 40 mai kahana idia lao vadaeni, January 15, 1955, ena Watchtower lalonai hereva ta ladana “Oiemu Gaukara Ia Hegeregere, A?” idia halasia. Unai hereva ese ia hahedinaraia namonamo edena bamona Iehova ena taunimanima ta ta ese edia hesiai gaukara idia hanamoa diba bena edia Basileia gaukara idia habadaia. Hari inai negai danu, unai sisiba namona be mai anina bada, iseda gaukara ita hanamoa totona.
2 Namona be inai hahegani badana ese ita ia doria dainai iseda gaukara ibounai ita karaia, ia gwau: “Lohiabada oiemu Dirava oi ura henia, mai oiemu kudouna ibounai, mai oiemu lauma ibounai, mai oiemu lalona ibounai, bona mai oiemu goada ibounai.” (Mar. 12:30) Iehova dekenai iseda lalokau ibounai ita hahedinaraia, bema ita davaria daladia ibounai be ita gaukaralaia namonamo, iena Basileia gaukarana habadaia totona. Emu hesiai gaukara do oi habadaia diba daladia, henunai ai torea gaudia, mani oi laloa.
3 Emu Maduna Oi Huaia: Idia gwauhamata vadaeni tadikaka idia gaukara goada diba bena do idia hegeregere hesiai taudia edia gaukara do idia karaia diba bona gabeai elda gaukarana idia karaia diba. June 1, 1991, Gima Kohorona lalonai inai hereva “Gaukara Ena Dagi Oi Tahua, A?” bona “Oi Hegeregere Gaukara Karaia Totona, A?” ese tadikaka momo idia hagoadaia bena sibona idia henia, kongregesen ena maduna idauidau idia huaia totona. Gaukara oi tahua bona do oi hegeregere daladia be emui kongregesen ena elda taudia dekenai oi henanadailaia be namo.
4 Idia do headava lasi elda bona hesiai taudia be idia boiria do idia laloa namonamo bona aplikeisen do idia henia Australia ai do idia karaia Hesiai Gaukara Hadibaia Sikulina totona. Unai sikuli oi diba totona Society ena magasin haida oi duahia. (w87-E 6/1 27-30; w88-E 3/15 30-1; g93-E 9/8 18, 19; w98 1/1 24) Oi vairanai ‘gaukara badana ena iduara’ ia kehoa noho, a? (1 Kor. 16:9a) Tadikaka haida be idia hekwarahi bada, English gado idia herevalaia namonamo totona bena sikuli amo namo idia davaria bona unai dainai idia ita hanamoa. Papua New Guinea amo tadikaka 8 be unai hahenamo idia abia bona hari idia momo be iniseniai regula o spesel painia gaukara idia karaia o sekit durua gaukarana idia karaia.
5 Ful-Taim Hesiai Gaukarana Oi Tahua: Haisikuli idia haorea matamata taudia, ruma hahinedia, bona edia mauri laganidia dainai moni gaukara amo idia ritaea taudia ese painia gaukara idia laloa namonamo be namo. July 1998 Iseda Basileia Gaukara lalonai idia udaia pepana oi duahia lou, bena guna edia noho daladia be oiemu noho dalana hegeregerena painia taudia oi hereva henidia. Reana oi ese painia gaukara amo emu hesiai gaukara do oi habadaia, idia karaia bamona. (1 Kor. 11:1) Oi hegeregere emu gaukara oi habadaia bona hua ta ta ai hora 70 oi karaia bena unai amo regula painia gaukara do oi karaia, a?
6 Hari, tanobada hegegemadai idia noho brens opesi bona Betele rumadia lalodiai, tadikaka bona taihu 17,000 ia hanaia be idia gaukara noho. June 15, 1994, Gima Kohorona ena rau 28-31 ese unai hesiai gaukara amo idia vara hahenamodia ia herevalaia. Namona be unai Gima Kohorona oi duahia bona do oi itaia bema oi be idia hegeregere taudia ta, bena Betele dekenai hesiai gaukara namo hereana oi karaia diba. Betele ai oi gaukara totona idia ura dahaka oi karaia be namo gaudia ma haida oi dibaia, bema distrik hebouhebou ai Betele gaukara idia ura karaia taudia totona idia karaia hebouna dekenai oi lao. Emu sekit naria tauna danu ese unai gauna dekenai oi ia durua diba.
7 Heduru Idia Abia be Namo Gabuna ai Hesiai Gaukara Oi Karaia: Oi noho gabuna ai, teritori be idia karaia loulou o tadikaka momo idia noho maduna idia huaia totona, a? Emu hesiai gaukara oi habadaia totona emu kongregesen o kahirakahira ai idia noho kongregesen henunai idia noho grup maragidia durua gaukarana oi laloa, a? Reana tadikaka be momo lasi gabuna dekenai oi lao diba oi noho totona. (Mat. 9:37, 38) Namo lasi unai oi karaia haraga. Namona be mai guriguri danu oi lalohadailaia namonamo. (Luka 14:28-30) Oiemu noho dalana be elda taudia bona sekit naria tauna ida umui herevalaia. Oi ida do idia tahua namonamo bema aonega karana be unai gabu dekenai hari oi lao o oi hegaegae vaira negana ai oi lao totona. Bema oi ura Society oi tore henia bena edia lalohadai edena gabu do oi lao be namo do oi diba totona, namona be emu Kongregesen Hesiai Komiti ese ia sainia revarevana be emu revareva ida oi siaia.
8 Emu Gaukara Ena Namo Habadaia: Ita ibounai ese hesiai gaukara lalonai iseda kahana ita habadaia diba, iseda haroro gaukara ena namo ita habadaia karana amo. Oi be haroro gaukara ena kahana idauidau ibounai, hegeregere ruma ta ruma ta, gabu bona nega idauidau, lou henia, bona Baibel stadi gaukaradia lalodiai oi vareai, a? Bema oi be stadi ta oi karaia noho, emu hadibaia dalana oi hanamoa diba, a? Namona be June 1996 Iseda Basileia Gaukara lalonai idia udaia pepana oi duahia lou bena ena heduru herevadia oi gaukaralaia emu stadi taudia oi durua idia gwauhamata bona idia bapatiso totona.
9 Hesiai Gaukara Karaia Totona Ita Hegaegae bukana ena karoa 9 ese iseda hesiai gaukara ita habadaia bona hanamoa daladia ia herevalaia badabada. Momokani, namona be ita ibounai eda ura be Dirava ena hesiai gaukara lalonai ita karaia diba gaukara iboudiai ita karaia. Namona be lauma dalanai oi tahua gaudia oi laloa namonamo, ani? Timoteo Ginigunana 4:15, (NW) ena hereva oi badinaia, ia gwau: “Inai gaudia oi laloa namonamo, idia dekenai oiemu lalona ibounai oi henia, bena taunimanima iboudiai do idia itaia oiemu goada ia bada ia lao.”