Dahaka Dainai Keristani Taudia ese Kuku Eiava Buatau Idia Ania Lasi
1 Keristani kongregesen goevana lalonai idia noho taudia ese ‘edia tauanina idia henia Dirava dekenai. Boubou gauna bamona idia henia, mai mauri bona mai helaga danu.’ (Roma 12:1) Kuku eiava buatau—herevana ta ese ahu danu ia ania eiava lasi—be unai dala hegeregerena lasi. Keristani taudia dekenai unai be kara kerere, badina (1) ia ese ta be ena hesiai tauna ai ia halaoa, (2) iseda tauanina do ia hadikaia, bona (3) ia be miro gauna. (Roma 6:19; 2 Kor. 7:1) Ena be unai gaudia ita dadaraia be mai ena hekwarahi, to Iehova ita hamoalea totona ita dadaraidia be gau badana.—Mar. 12:29, 30.
2 Idia gwau kuku bona buatau ania karana ese ta ena tauanina ia hadikaia diba. Bema ta be unai bamona gaudia ia gaukaralaia, ia gwau diba ia be Dirava ia badinaia ‘mai ena goada ibounai’ ida, a? Kuku ena kwalahu bona buatau ia ania bena ia kanudi karana amo gabu ia hadikaia be dekena tauna ‘ia lalokau henia’ karana, a?—Luka 10:27, 28.
3 Ta be bapatiso lasi pablisa tauna ai ia lao totona, eiava Tiokratik Haroro Sikuli lalonai ia vareai totona, gau badana be buatau, kuku, bona drag ania karadia, mariuana danu, ia rakatania guna. Bema bapatiso Keristani tauna be unai bamona miro gaudia ia gaukaralaia matamaia, ia be kongregesen murimurinai do idia atoa diba.
4 Bema tau ta ena tano dekenai buatau, kuku (eiava mariuana) ia hadoa—eiava unai bamona gaudia be ia eiava ma haida totona ia hoihoilaia—unai dika havaraia gaudia gaukaralaia karana ia habadaia. Gavamani ese mariuana ia taravatua danu. Unai be dekena tauna lalokau henia karana lasi bona ia be hegeregere lasi bapatiso lasi pablisa tauna ai ia lao totona. (Luka 10:27) Unai bamona ia karaia bapatiso tauna be kongregesen murimurinai do idia atoa.
5 To bema ta idia noia ena motuka amo varavara eiava ma haida edia buatau, kuku, eiava mariuana ia abia lao maketi dekenai be edena bamona? Bema varavara eiava ma haida be hanua amo idia mai unai gaudia be maketi dekenai idia hoihoilaia totona, ta be ena ruma dekenai ia abia dae karana be edena bamona? Bema ita diba moni abia totona ita ese taunimanima edia tauanina do ia hadikaia gaudia ita hoihoilaia, eiava unai kara dekenai iseda varavara ita durudia, ita ese dekena tauna lalokau henia karana ita hahedinaraia, a? (Luka 10:27) Ia ura ena lalona ena mamina ia namo Keristani tauna be gavamani ese ia taravatua gaudia, hegeregere mariuana, idia hoihoilaia totona, haida ia durua be maoro, a? (2 Kor. 6:3; Tito 3:1) Ena be haida be unai gaudia amo moni idia abia, to Iehova hamoalea totona edia buatau audia idia utua eiava kuku raudia idia gabua. Unai bamona idia karaia taudia, ena be moni dalanai hekwakwanai idia davaria eiava haida ese idia kirikirilaidia, to idia do ia hagoadaia gauna be Iehova ese iena taravatu idia badinaia taudia ibounai be ia lalodia boio lasi.—Gal. 6:4, 5; 1 Kor. 10:13; Sal. 119:97.
6 Iehova Dirava bona ena ura ita diba karana ese ita ia hagoadaia miro karadia ibounai ita dadaraia totona. Namona be miro gaudia idia dadaraia taudia ibounai ese Iehova ena hesiai gaukara dekenai idia goeva noho be gau badana.—2 Kor. 7:1; 1 Pet. 3:14.
This article is unique to PNG and is repeated in km 8/07.