“Lohiabada Totona Idia Hekwarahi Bada” Hahinedia
1 Ataiai ia noho herevana amo, Paulo ese Trupena bona Truposa, Roma kongregesen dekenai idia gaukara goadagoada taihudia rua, ia herevalaia. Ma ta, Peresi, ia herevalaia neganai ia gwau: “Gaukara bada ia karaia vadaeni Lohiabada totona.” Bona Fibi ia hanamoa danu, ia gwau “taunimanima momo ia durua vadaeni.” (Roma 16:2, 12) Baibel lalonai, Doreka idia gwauraia “kara namona bona bogahisihisi kara dekenai ia goada” hahinena. (Kara 9:36) Lauma dalanai idia goada hahinedia be hahenamo badana kongregesen dekenai!
2 Iseda kongregesen dekenai idia gaukara goadagoada taihudia ita laloa bada, a? Idia ese haroro gaukara ena kahana badana idia karaia, Baibel stadi momo idia karaia, bona kamonai matamata taudia momo idia durua. Idia ese nega bada idia atoa danu natudia do idia durua bena lauma dalanai idia goada idia lao totona. Keristani hahine ese edia kahana idia karaia lalokau, moale, maino, bona lalo-goada karadia be kongregesen lalonai idia habadaia totona. Idia be dala idauidau momo dekenai heduru idia henia, unai amo edia adavadia bona ruma bese taudia ma haida ese Iehova dekenai edia hesiai gaukara idia habadaia diba.
3 Ful-Taim Hesiai Gaukara Idia Karaia Taihudia: Lohiabada dainai idia gaukara goadagoada taudia haida be misinari taihudia, idia momo ese idau tanodia dekenai gaukara ena tubu dalana idia durua bada. Distrik bona sekit naria taudia ese idia durua kongregesen idauidau dekenai, edia hahine be haroro gaukara lalonai idia bisi bada, bona taihu momo idia hagoadaia. Betele dekenai idia gaukara taihudia ita laloaboio lasi be namo, edia hesiai gaukara helagana idia karaia goadagoada Iehova ena orea durua totona. Bona iseda regula painia taihudia, mai edia abidadama ida idia hekwarahi Dirava idia hanamoa totona, ese taunimanima tausen momo idia durua hereva momokani idia diba totona.
4 Sibona edia ura idia dadaraia mauri dalana amo, unai abidadama hahinedia ese moale bada idia davaria. (1 Tim. 6:6, 8) Idia be hegeregere iseda hanamoa herevadia, hagoadaia herevadia, bona heduru idia abia.
5 Keristani hahinedia be mai anina bada Iehova ena orea dekenai, idia ese mai edia abidadama ida idia karaia hesiai gaukara be hahenamo ibounai dekenai. Namona be unai bamona hahine ita lalodia bada bona ita guriguri Iehova ena hahenamo idia abia noho “Lohiabada totona idia hekwarahi bada” lalonai.