“Emui Hekwarahi be Hekwarahi Kava Lasi”
1 Unai be lalona ia hagoadaia herevana! Emu hekwarahi Iehova ena hesiai gaukara dekenai be hekwarahi kava lasi. (1 Kor. 15:58) To mani inai oi laloa, taunimanima be idia hekwarahi bada edia mauri lalonai dagi bada idia abia totona, bona moni ena hekwakwanai idia hanamoa totona. Reana lagani momo lalonai edukeisen idia tahua, eiava hesiai tauna bamona idia gaukara goadagoada kohu idia habadaia totona. To, “ibounai ese nega dika idia davaria noho” dainai, idia tahua dagi bada eiava kohu be reana do idia abia lasi. ‘Lai idia lulua kava hegeregerena’ edia hekwarahi be anina lasi. (Had. 1:14; 9:11) Unai dainai, gau badana be mai anina bada gaukarana ita karaia goadagoada, badina ia ese nega daudau lalonai namo do ia havaraia!
2 Mai Anina Bada Gaukarana: Dirava ena Basileia harorolaia gaukarana be mai anina bada gaukarana tanobada dekenai. Unai gaukara ita karaia ena be taunimanima idia kamonai eiava lasi. Paulo hegeregerena, ita ura ita gwau: “Bema umui ta ia boio, kerere be lau lasi. Badina be Dirava ena ura ibounai umui dekenai lau hamaoroa, gau ta lau hunia lasi.”—Kara 20:26, 27.
3 Taunimanima ese Basileia ena sivarai idia kamonai bona abia dae neganai ita moale bada herea! Hahine matamata ta ena lalana ia mase. Ena lalana be edeseni ia lao ia lalohadailaia—guba eiava hel dekenai? Heduru totona Dirava ia guriguri henia bona ena kakana ese ia hadibaia hegeregerena, ladana Iehova ia gaukaralaia. Daudau lasi murinai, Baibel ia stadilaia bona Keristani heboudia dekenai ia lao. Mauri dekenai lalohadai matamatana ia abia bona raskol oreadia bamoa karana ia rakatania. Unai hahine matamata ese kuku bona drag ania kava karadia bona henaohenao karana ia hadokoa. Ia gwau: “Egu lalokau Iehova dekenai sibona ese lau ia doria unai bamona mauri dikana lau rakatania totona. Iehova sibona ese ena hebogahisi bada dainai mauri hanaihanai helarona be lau dekenai ia henia diba.” Hari ena mauri lalonai anina lasi gaudia ia tahua lasi.
4 Ena be taunimanima idia kamonai lasi, to mai anina bada gauna oi do hagugurua noho. Idia diba Iehova ena Witnes taudia ese idia vadivadi henia. Oiemu kara maoromaoro, abidadama, bona lalokau oi hamomokania. Unai dainai, emu hekwarahi Lohiabada ena gaukara lalonai be hekwarahi kava, a? Lasi momokani!