Henanadai Mauana

◼ Kongregesen heboudia dekenai daika ese guriguri ia gwauraia diba?

Kongregesen dekenai idia gwauraia guriguri be iseda tomadiho ena kahana badana ta. Ma haida vairanai Iehova oi guriguri henia be hahenamo badana bona maduna metauna ta. Guriguri be mai anina bada dainai, namona be elda taudia idia itaia namonamo, edena tadikaka be idia hegeregere hebou dekenai guriguri idia gwauraia totona. Namona be kongregesen vairanai guriguri idia gwauraia bapatiso tadikaka be haheitalai namona lo Keristani taudia bona idia be kongregesen taudia ese idia matauraia. Namona be edia hemataurai gurigurina ese idia hahedinaraia Iehova Dirava ida edia hetura karana be namo herea. January 15, 1999 ena Gima Kohorona ai, hereva ladana “Guriguri Dekenai mai Badinaia Karana ida Emui Imana Umui Abia Isi” dekenai mai anina bada hakaua hereva idia noho, kongregesen taudia vairanai guriguri idia gwauraia taudia ia durua bada.

Elda taudia be haida ese ena kara idia henanadailaia eiava ena kara be kavakava bamona tauna idia gaukaralaia lasi. Ia badu momo tadikaka eiava ta ia badu henia dainai guriguri lalonai unai ia herevalaia tauna do idia abia hidi lasi. (1 Tim. 2:8) Ena be matamata tadikaka ta be ia bapatiso vadaeni, to elda taudia do idia tahua bema lauma dalanai ia hegeregere kongregesen vairanai guriguri do ia gwauraia totona.​​—Kara 16:​1, 2.

Nega haida haroro gaukara ena hebou dekenai, ia bapatiso taihu ta ese reana guriguri do ia gwauraia bema ia hegeregere tadikaka ta ia noho lasi guriguri ia henia totona. Ena kwarana ia koua gauna maorona ia atoa be namo. Bema ia hegeregere tadikaka ta be unai bamona hebou ta dekenai do ia noho diba lasi, namona be elda taudia ese ia lo taihu ta idia abia hidi diba haroro hebou ia hakaua totona.

Nega momo Pablik Tok dekenai seamani ese hebou ia kehoa gurigurina ia gwauraia. To, kongregesen ena hebou ma haida dekenai, idia hegeregere tadikaka momo idia noho neganai, reana hebou ia kehoa eiava koua gurigurina be hebou ia kehoa tadikakana eiava kahana ginigabena ia karaia tauna ese idia gwauraia lasi, to tadikaka ma haida ese do idia gwauraia. Herevana edena bamona, to kongregesen ena hebou dekenai guriguri do ia gwauraia tauna idia hadibaia guna be namo unai dala amo ia gwauraia herevana ia lalohadailaia diba. Bena unai hebou totona guriguri mai anina bona mai momokanina be ia gwauraia diba.

Unai bamona guriguri idia lata be namo lasi. Tadikaka ta ese taunimanima vairanai guriguri ia gwauraia neganai, namona be ia gini, ena gadona ia habadaia, bona ia hereva goevagoeva be namo ena hereva idia lalo-pararalaia totona. Unai dala amo hebou taudia ibounai ese guriguri do idia kamonai bona ia doko neganai mai edia lalona ibounai ida “Amen!” idia gwauraia diba.​​—1 Siv. 16:36; 1 Kor. 14:16.