Dirava Ena Hereva Oi Badinaia mai Moale Ida
1 Iesu ia gwau do ia noho negana lalonai, taunimanima momo be Noa ena negai momo idia karaia bamona do idia “laloa lasi.” (Mat. 24:37-39) Unai dainai ita diba, momo be Basileia sivarai namona do idia kamonai lasi. Dahaka ese ita do ia durua diba, hesiai gaukara ita karaia neganai ita moale totona?—Sal. 100:2.
2 Gau ginigunana be, namona be ita laloatao ita gwauraia hereva bona iseda hahegani haroro totona be Dirava amo. Hesiai gaukara lalonai bema ita idia abia dae lasi ena be ita hekwarahi bada, ena anina korikorina be Iehova idia dadaraia. Bema ita laloatao mai kamonai ida ita haroro neganai iena lalo-namo ita abia, unai ese ita do ia durua Dirava ena hereva ita badinaia lalonai do ita moale.—Iam. 1:25.
3 Gau iharuana be, Iehova ena hahemauri dalana do idia abia dae taudia idia do noho. Ena be reana taunimanima momo be do idia kamonai lasi, to hari inai negai, nega ena dokona lalonai, danu mamoe bamona taudia idia do noho ita haboua totona. Ita haroro noho be namo, ita lao ‘hanua maragidia bona badadia’ dekenai ‘kara namo taudia ita tahua.’—Mat. 10:11-13.
4 Lalohadai Namona Oi Abia: Tomadiho koikoi ena sivarai dikadia ese haida edia lalona ia hahisia. Inai tanobada ena oromana dainai, haida “idia manokamanoka.” (Mat. 9:36) Momo be reana gaukara, tauanina naria daladia, bona noho namona be lasi dainai idia lalohisihisi. Unai ita lalo-pararalaia karana ese ita do ia durua iseda gaukara lalonai ita goada noho totona. Iseda teritori ai idia noho taudia idia laloa bada gaudia ita herevalaia toho. Idia oi durua do idia diba Dirava ena Basileia sibona ese hekwakwanai ibounai do ia haorea. Sivarai namona be edia kudouna lalonai ia vareai totona, Buka Helaga bona oi hariharilaia buka eiava magasin edia hereva oi gaukaralaia.—Heb. 4:12.
5 Mai moale ida Dirava ena hereva idia badinaia taudia be hanaihanai idia laloatao: “Lohiabada dainai ita moale neganai, goada do ita abia.” (Neh. 8:10) Iseda moale ita haboioa be anina lasi. “Bema ruma taudia idia namo, umui emui hanamoa be idia latanai do umui atoa. To bema idia dika, umui emui hanamoa do umui abia lou.” (Mat. 10:13) Iehova ena hesiai gaukara helagana ita karaia mai haheauka neganai, iseda moale ia hamatamataia lou bona ita ia hagoadaia, bona iseda abidadama karana ia hanamoa.