Kara Namo Ita Karaia Bona Ita Do Idia Hanamoa!
1 “Taunimanima ma haida dekenai, inai bamona noho namonamo karana lau itaia lasi.” “Inai orea ia noho be namo herea.” Lagani gunana ena distrik hebouhebou murinai, ita idia itaia taudia be unai bamona hereva namodia momo idia gwauraia, unai amo iseda orea ena namo idia hahedinaraia. (Aon. 27:2; 1 Kor. 4:9) Momokani, unai bamona hanamoa hereva be Iehova dekenai ia lao. (Mat. 5:16) Dirava ita hanamoa dala hereana ma ta be iseda vairanai ia noho, inai lagani ena “Dirava Ena Hereva Hadibaia Taudia” Distrik Hebouhebouna.
2 Lagani ta ta ai, iseda kara namona hahedinaraia karana dekenai hadibaia herevadia ita abia. Dahaka dainai? Badina tanobada ena laloa dalana, dabua, bona kara idia dika idia lao lalonai, ita ura lasi edia kara ita tohotohoa. Ita ura lasi iseda ladana namona ita hadikaia. (Efe. 2:2; 4:17) Namona be henunai idia noho sisiba ita laloatao.
3 Kara Namo Karaia—Emu Noho Gabuna Ai: Taunimanima idia diba ita be kara momokani taudia. (Heb. 13:18) Unai dainai, namona be ita hereva momokani, taunimanima hida be ita ida iseda daiutu dekenai idia noho. Bema daiutu lalonai nadunadu karana idia taravatua, namona be ita karaia lasi. Iseda tadikaka be edia ruma dekenai ita idia abia dae neganai, namona be idia ita matauraia. Edia heabidae karana ita laloa bada dainai moni sisina ita henia aniani bona ma gau haida edia davana karaia totona.
4 Ita idia itaia taudia ese iseda matamata taudia edia manau bona kara namo idia laloa bada. (Efe. 6:1, 2) Tama sina e, mani emui natudia umui naria unai amo ma haida edia noho namo idia hadikaia lasi. Namona be ibounai ese hanuaboi momokani ai edia iduara idia koua badabada lasi eiava regerege bada idia karaia lasi.
5 Kara Namo Karaia—Hebouhebou Gabuna Ai: Ai itaia hebouhebou taudia haida be edia helai gabudia idia rakatania bona idia giroa lou lasi. To, idia be ma gabu haida dekenai idia helai bona program ena mai anina bada kahadia idia reaia. Ena be hora haida siahu lalonai ita helai dainai mamina be ia namo momokani lasi, to namona be program ena hereva ta ita reaia lasi. Atendan taudia ai hadibaia vadaeni, ma gabu haida dekenai idia helai taudia eiava idia loaloa taudia idia hamaoroa edia helai gabudia dekenai idia giroa lou totona. Program ia heau lalonai, volantia taudia be edia gaukara idia haorea murinai namona be edia helai gabudia dekenai idia giroa lou.
6 Natudia be mei ruma dekenai idia lao neganai, edia tama sina ese idia bamoa be namo unai amo idia itaia natudia ese gabu idia hamiroa lasi, bona helai taudia idia helai gabuna dekenai idia giroa lou haraga. Ibounai ese mei rumana idia gaukaralaia murinai, edia imana idia huria namonamo be gau badana, unai amo gorere do idia koua. Namona be tama sina ese edia natudia idia naria, hebouhebou gabuna dekenai idia gadara lasi bona program idia kamonai taudia edia kamonai karana idia hadikaia lasi. Program ia heau lalonai PK eiava aniani ania karana ese ma haida edia kamonai karana idia hadikaia bona Keristani heboudia dekenai unai be maoro lasi.
7 Kara Namo Karaia—Iseda Dabua Bona Tauanina Ena Toana Amo: Lagani gunanai, distrik hebouhebou ta murinai, siti badana ta ena niuspepa edita ta, ia gwau: “Gau iboudiai amo, Witnes taudia edia kara be idau herea. Taunimanima momo herea lau itadia, mai hemataurai ida idia raka vareai be moale gauna momokani. Edia Sunday ena dabua namo herea idia karaia, ruma bese handred momo herea bese bona iduhu idauidau amo be mai regerege lasi ida steidiam dekenai idia vareai. Edia kara be idau herea unai steidiam dekenai idia mai hutuma momo edia kara amo. Momokani, Witnes taudia be unai hutuma amo idia idau herea. Taunimanima momo idia lao gabudia dekenai, taunimanima edia hemataurai lasi karana be gau matamatana lasi. . . . Momokani, Witnes hutuma lau itaia ese lau ia hamoalea.” Iseda dabua, tauanina ena toana, eiava iseda kara be hebouhebou ena lauma gaudia laloa bada karana amo ia idau lasi be namo.—Fili. 1:10; 1 Tim. 2:9, 10.
8 Kara Namo Karaia—Bapatiso Ai: Bapatiso abia gwauraia taudia be unai kara do idia laloa mai hemataurai ida. Hemataurai digudigu dabua karaia karana amo idia hahedinaraia unai kara be kara helagana. Baibel stadi idia karaia taudia ese edia stadi taudia ida April 1, 1995, Gima Kohorona dekenai ia noho “Duahia Taudia Edia Henanadai” idia herevalaia guna be namo.
9 Iseda toana bona Dirava badinaia karana ese iseda Keristani abidadama ia hamomokania bona dala ia kehoa kudou-maoro taudia ese hereva momokani idia abia dae haraga totona. Unai dainai namona be ‘kara namo do ita karaia’ noho bona “Dirava Ena Hereva Hadibaia Taudia” Distrik Hebouhebouna ita lao henia lalonai ita do idia hanamoa.—Roma 13:3.