Hakaua Orea Amo Ia Mai Revareva

Iehova ese ita ia hanamoa! Ita be Iehova ena Witnes taudia dainai, iseda hahenamo ta be Iehova, ia mauri noho Dirava momokanina tamona, guba bona tanobada ia Havaraia Tauna, ita diba sibona lasi, to ena ladana ita huaia bona ia ita hesiai henia diba. Unai ese hahenamo ma haida ia hereaia momokani!​—Isa. 43:12; Heb. 8:11.

Ita be hahemauri ena helaro ita abia bona iseda hahegani be Basileia sivarai namona ita harorolaia, ma haida danu ese reana Iehova do idia tomadiho henia bona helaro tamona do ita abia. (Mat. 24:14; Roma 10:​13, 14; 1 Tes. 5:8) Danu, ita be idia lalokau heheni bona ta ta idia durua intenesenel tomadiho taudia edia orea lalonai ita vareai bona unai dainai ita moale. Unai ibounai be hahenamo badana!

Baibel ese ita ia boiria, ia gwau: “Lohiabada do umui tomadiho henia, mai emui moale danu. . . . Lohiabada ena Dubu Helaga lalonai do ita raka vareai, mai tanikiu danu. Iena Ruma lalonai Lohiabada ena ladana do ita abia isi, Lohiabada do ita tanikiu henia. Iena ladana do ita hanamoa bada, badina be Lohiabada ena kara be namo. Iena lalokau bona bogahisihisi, be do idia noho ela bona hanaihanai. Ia ese iena hereva bona iena kara, be do ia haidaua lasi ela bona hanaihanai.” (Sal. 100:​2-5) Iseda hetura karana Iehova ida ia goada neganai, mai moale ida ia ita hesiai henia diba. Ia ese unai hetura karana dekenai dala ia havaraia, bona iseda hahenamo be unai hetura karana do ita habadaia diba. Unai bamona hetura karana ita abia neganai, ita diba hekwakwanai negadiai Iehova be hanaihanai ita do ia durua bona hagoadaia. Ita diba momokani Iehova ese lauma dalanai goada do ia henia bona ita do ia hakaua dina gabedia lalonai inai tanobada ena oromana dikana ena hekwakwanai ita hanaia totona. Herevana hekwakwanai ita davaria, to iseda hesiai gaukara ita moalelaia, bona dina ibounai Iehova ita tanikiu henia, badina iena Hereva ese ita ia hadibaia lou hegeregerena, ‘ia ese ita ia naria.’​—1 Pet. 5:7.

Lagani gunadia lalonai, Iehova ese ita ia hanamoa bada. “Dirava Ena Hereva Badinaia Taudia” Distrik Hebouhebouna dekenai ita moale bada badina abidadama tamona taudia ida ita noho, ane ita abia, bona Iehova ena lauma aniani patana dekenai ita aniani hebou. Iseda Kongregesen Buka Stadi dekenai, ita ese Ruma Bese Ena Moale Havaraia Dalana bukana ita stadilaia dainai ita moale! Ia amo diba namona ita abia iseda ruma bese mauri durua totona. Ai ura ruma bese iboudiai ese unai buka idia duahia loulou edia ruma bese idia hagoadaia totona bona ruma bese taudia ta ta ese Iehova idia abidadama henia goadagoada totona. ‘Iseda kapusi be ia ese ia hahonua noho.’​—Sal. 23:5.

Ita diba ita milioni momo, lauma dalanai ita tadikaka bona taihu taudia, be Iehova ita hesiai henia lalonai ita lalo-tamona dainai ita moale! Haroro gaukara lalonai gau idauidau edia namba idia bada daekau ita duahia neganai goada ita abia! Taunimanima milioni momo be iseda Lohiabada ena mase ena Memorial dekenai idia lao dainai ita moale​—bona unai idia karaia ena be tanobada ai hekwakwanai idauidau idia vara. Tanobada ibounai haroro gaukarana ita laloa neganai, ita itaia “uiti anina be ia momo herea.” (Luka 10:2) Lagani gunana ai, pura ta ta lalonai idia goada idia lao bena edia gwauhamata be ranu bapatiso amo idia hahedinaraia Baibel stiuden taudia edia averes be 5,555. Ena be tanobada ena kahana haida dekenai uiti anina be ia momo bona kahana ma haida dekenai be unai bamona lasi, to Iehova ese ia karaia karadia be ita ibounai ese ita moalelaia. Ita itaia goevagoeva ena hesiai taudia be mai lalo-tamona ida idia gaukara hebou neganai idia ia hanamoa momokani.

Kingdom Hall matamatadia haginia gaukarana be ita moalelaia bada gauna ma ta! Ogogami tanodia dekenai, tadikaka bona taihu be mai edia kudouna ibounai ida inai gaukara idia durua dainai ita moale. Treinini idia abia Kingdom Hall Haginia Grup idauidau ese Kingdom Hall handred momo idia haginia vadaeni. Unai tadikaka be edia tano dekenai Kingdom Hall haginia gaukarana idia gunalaia totona, kongregesen ta amo idia lao ma ta dekenai. Kingdom Hall tausen momo do idia haginia be namo, unai dainai, ogogami tanodia dekenai volantia taudia momo idia boiria inai gaukara do idia durua totona. Bema unai bamona tanona dekenai oi noho, heduru do oi henia diba, a? Iseda lalokau tadikaka bona taihu be do idia tomadiho hebou totona sibodia edia Kingdom Hall idia abia be idia moalelaia bada! Bona tanobada ibounai lalonai tadikaka oreana taudia ese edia moni amo heduru idia henia dainai idia tanikiu bada!

Kota dekenai idia kwalimu sivaraidia ese ita idia hamoalea. To, gabu momo dekenai siahu bada taudia idia noho danu bona idia ura Iehova tomadiho henia karana idia koua. Unai karadia ai hamaoromaoroa neganai, ai diba momokani, Iehova ese ena hesiai taudia ia durua lalonai, herevana edia toana be idia manoka bona edia inai taudia be momo, to Ia kwalimu diba. (2 Siv. 14:11) Tomadiho momokani totona umui gini goada noho tadikaka bona taihu ibounai ai hanamoa bada.

Emui abidadama umui hagoadaia noho bona mai moale ida emui Keristani gaukara umui karaia noho lalonai, Iehova dekenai umui tabekau bona ia ese dala maorona umui dekenai do ia hadibaia. (Aon. 3:​5, 6) Umui lalo-manoka lasi be namo, herevana umui idia inai henia taudia be dahaka do idia karaia. Elisaia ese ena lalo-hekwarahi hesiai tauna ia hagoadaia totona ia gwauraia herevana umui laloatao, ia gwau: “Oi gari lasi, badina be ita idia durua taudia be momo, to unai orea idia durua taudia be momo lasi.” (2 Kin. 6:​15-17) Hari inai negai, Iehova ena guba tuari oreana be ia gini hegaegae tomadiho goevana ia naria totona, Elisaia ena negai ia karaia bamona. Mai lalo-goada ida vaira negana ita naria. Iehova ese gau iboudiai ia biagua. Bese ibounai be ia vairanai idia kwalimu diba lasi. Ia ese ena Natuna be king ai ia halaoa bona siahu ia henia. “To ia dekenai idia abidadama taudia be idia moale, ia ese ia naridia dainai.”​—Sal. 2:​1-6, 12.

Mani emui kara umui laloaboio lasi umui lalokau tadikaka bona taihu ibounai be ai laloa bada hanaihanai. Ai guriguri goada umui ta ta ibounai be ‘do umui gini goada bona Dirava ena ura ibounai be do umui diba namonamo.’​—Kol. 4:12.

Emui tadikaka,

Iehova ena Witnes taudia edia Hakaua Oreana