Oi Ura Emu Hesiai Gaukara Oi Habadaia, A?
1 Iesu ia gwau Basileia be davana bada kohu bamona. (Mat. 13:44-46) Basileia sivaraina harorolaia gaukarana danu be davana bada kohuna ta. Iseda mauri lalonai haroro gaukara ita atoa guna be gau badana, ena be do ita gaukara goadagoada to sibona eda ura ita dadaraia be namo. (Mat. 6:19-21) Oi ura emu Basileia hesiai gaukara oi habadaia, a?
2 Inai Anina Bada Gaudia Oi Laloa: Ita sibona eda hesiai gaukara ita habadaia totona gau haida be mai anina bada: (1) iseda lalona ita hadaia iseda mauri lalonai Basileia ita atoa guna. (Mat. 6:33); (2) abidadama ita hahedinaraia bona Iehova dekenai ita tabekau. (2 Kor. 4: 1, 7); (3) mai iseda lalona ibounai ida guriguri hanaihanai karana amo, Dirava ena heduru ita tahua. (Luka 11:8-10); (4) iseda guriguri hegeregerena ita karaia.—Iam. 2:14, 17.
3 Iseda Hesiai Gaukara Ita Habadaia Daladia: Ita ibounai ese tahua gauna ita atoa diba, nega do ita atoa hua ta ta iboudiai ita haroro totona. To oi be nega idauidau bona gabu idauidau ai dala ia kehoa negadiai oi haroro, a? Oi hekwarahi emu hereva daladia oi hanamoa, a? Lou henia ai anina havaraia karana oi habadaia, a? Bona oi hekwarahi Baibel stadi namona oi karaia totona, a? Oi be hegeregere heduru painia eiava regula painia gaukara oi karaia eiava durua idia ura gabudia dekenai oi gaukara diba, a? Bema oi be bapatiso tadikaka ta, oi gaukara goada hesiai tauna eiava elda tauna ai oi lao totona, a? (1 Tim. 3:1, 10) Betele gaukara, Hesiai Gaukara Hadibaia Sikulina, eiava misinari hadibaia Gilead Sikuli edia aplikeisen oi siaia diba, emu hesiai gaukara oi habadaia totona, a?—Luka 10:2.
4 Tadikaka ta be guna ful-taim moni gaukara ia karaia bona ena nega bada be spot gadara dekenai ia haorea, to idia hagoadaia regula painia gaukara do ia karaia. Heduru painia ia hamatamaia bena ena noho dalana ia haidaua ful-taim hesiai gaukara ia karaia totona. Gabeai Hesiai Gaukara Hadibaia Sikulina dekenai ia lao, bona unai sikuli ese ia durua dainai ia hegaegae hari ia karaia noho sekit naria gaukara ia karaia totona. Ia moale bada badina ia abia hagoadaia herevana ia badinaia, bona ia gwau hari ena moale ia bada badina Basileia gaukara lalonai ena hesiai gaukara do ia habadaia dalana ia abia hidi.
5 Iehova ese edia ura dainai sibona idia henia taudia ia hanamodia. (Isa. 6:8) Emu hesiai gaukara oi habadaia totona gau ta ese oi ia koua lasi be namo bona anina namodia do oi moalelaia bona goada do oi abia.