Iehova Ena Lalokau Laloa Bada Karana Ena Hahenamo—Kahana 1
1 Aposetolo Ioane ia gwau: “Ita be mai iseda lalokau, bona ena badina korikori be inai: [Iehova] ese ita ia lalokau henia guna.” (1 Ioa. 4:19) Iehova ese ita dekenai ia henia gaudia ibounai ita laloa neganai, ita ura unai gaudia ita laloa bada karana ita hahedinaraia. Iesu be unai bamona ia karaia, mai ena kamonai ida Dirava ena ladana bona Basileia ia harorolaia. (Ioa. 14:31) Namona be Iehova ena lalokau bona idia vara hahenamo ita laloa bada karana ita hahedinaraia daladia haida ita laloa.
2 Ruma-Ta-Ruma-Ta Gaukarana: Iesu be ena hahediba taudia dekenai Basileia harorolaia gaukarana karaia dalana ia hadibaia. Ena hakaua herevadia ese idia hahedinaraia goevagoeva idia be ruma ta ruma ta dekenai do idia lao, sivarai namona idia harorolaia. (Luka 9:1-6; 10:1-7) Idia ura lasi taudia bona dagedage taudia ita davaria neganai Dirava bona dekena taudia lalokau henia karana ese ita ia hagoadaia ruma-ta-ruma-ta gaukarana ita karaia noho totona. To, ita sibona be namo ita davaria badina iseda abidadama ia hagoadaia, iseda lalona ia hagoadaia, bona iseda helaro ia hadiaria.
3 Aneru edia hakaua henunai ita gaukara noho lalonai, hereva momokani dainai idia hitolo bona ranu mase taudia momo ita davaria. (Apok. 14:6) Ruma taudia idia gwau heduru idia abia totona idia guriguri neganai Witnes ta be edia ruma dekenai ia mai. Witnes taihu rua bona maragina ta be Caribbean motumotuna ta dekenai ruma-ta-ruma-ta gaukara idia karaia. Unai taihu rua be unai dina ena gaukara idia hadokoa neganai, unai maragina be sibona ia lao kahana rumana dekenai ia pidipidi. Hahine matamatana ta ese iduara ia kehoa. Taihu ruaosi be unai idia itaia neganai, idia lao bona idia hereva henia. Ena ruma ai ia abidia dae bona ia hamaorodia, Dirava ia noia Witnes taudia be ia dekenai do ia siaidia Baibel ena hereva do idia hadibaia totona!
4 Dala Dekenai Ita Haroro: Gabu haida dekenai taunimanima be edia ruma ai ita davaria be ia auka, unai dainai dala dekenai haroro gaukara be dala namona idia ita haroro henia totona. Taoni dekenai, taunimanima momo be idia gimaia namonamo gabudia dekenai idia noho, unuseniai ruma-ta-ruma-ta gaukara ita karaia be ia auka. To, Iehova ena lalokau ita laloa bada karana ese ita ia hagoadaia dala idauidau ai taunimanima be Basileia sivaraina ita hadibadia, dala ai haroro gaukara amo danu.—Aon. 1:20, 21.
5 Lou Henia Ita Karaia: Ita be “idia diba lauma gaudia idia tahua be namo” taudia ita tahua dainai, ita ura ita karaia diba gaudia ibounai ita karaia unai heduru do ita henia. (Mat. 5:3, NW ) Unai dainai ita giroa lou bona hereva momokani ena uhe ita hadoa gauna ita dairia be gau badana. (1 Kor. 3:6-8) Australia dekenai taihu ta be hahinena ta dekenai pepapepa ta ia rakatania, toana be unai hahine ia ura lasi. To, taihu be mai haheauka ida unai hahine ena ruma ia tahua lou. Ia davaria neganai, iseda taihu ia kamonai nega ginigunana idia hedavari murinai, unai hahine be dava bada Baibel ta ia hoia. Taihu be unai hahine ida stadi ia hamatamaia!
6 Baibel Stadi Ita Karaia: Unai be moale bada gauna bona iseda hesiai gaukara ena kahana badana. Taunimanima ita durua Iehova idia diba, ia idia hamoalea totona edia mauri lalonai gau haida idia haidaua ita itaia, bona edia gwauhamata Dirava dekenai be edia Keristani bapatiso amo idia hahedinaraia karana ita itaia be hahenamo badana!—1 Tes. 2:20; 3 Ioa. 4.
7 Sivarai gabena ai, ita ese Iehova ena lalokau ita laloa bada dainai hahenamo ita abia daladia ma haida do ita laloa.