Taunimanima Ibounai amo Idia be Moale Bada Taudia
1 “Edia Dirava be Lohiabada, ena bese taudia be idia moale noho.” (Sal. 144:15) Unai hereva ese ia hahedinaraia taunimanima ibounai amo Iehova ena Witnes taudia be moale bada taudia. Ia mauri noho Dirava momokani tamona, Iehova, tomadiho henia karana amo ia mai moalena ese moale ibounai ia hanaia. Ia be “moale Diravana” dainai, ia idia tomadiho henia taudia ese iena moale idia hahedinaraia. (1 Tim. 1:11, NW ) Iseda tomadiho karadia lalonai dahaka ese iseda moale idia habadaia?
2 Ita Moale Ena Badina Haida: Iesu ese ita ia hadibaia, “lauma gaudia [ita] tahua” karadia amo moale ita davaria. (Mat. 5:3, NW ) Unai karadia rua be Baibel ita stadilaia bona Keristani heboudia ibounai ita lao henia hanaihanai. Dirava ena Hereva lalonai ia noho hereva momokani ita dibaia karana ese tomadiho ena koikoi karadia bona dala kereredia amo ita ia ruhaia. (Ioa. 8:32) Baibel ena hereva ese ita dekenai mauri dalana namo hereana ia hadibaia. (Isa. 48:17) Unai dainai, iseda moale tadikaka oreana lalonai ita ese Keristani hebamo namona ita moalelaia.—1 Tes. 2:19, 20; 1 Pet. 2:17.
3 Dirava ena kara maoromaoro taravatudia ita badinaia dainai ita moale bada, badina ita diba unai ese ita ia gimaia bona Iehova ia hamoalea. (Aon. 27:11) Niuspepa torea tauna ta ia gwau: “Ena be Iehova ena Witnes taudia be mai edia taravatu momo, to idia moale. Oibe, toana be [idia huanai idia noho] matamata bona buruka taudia be moale bada bona laloa maoromaoro taudia.” Edena dala ai ma haida ita durua diba iseda moale ia havaraia mauri dalana idia badinaia totona?
4 Ma Haida Oi Durua Idia Moale Totona: Inai tanobada be lalo-hekwarahi amo ia honu, bona taunimanima ese vaira negana idia laloa neganai idia gari. To, ita moale, badina ita diba nega ta ai lalohisihisi ibounai be do ia ore. (Apok. 21:3, 4) Unai dainai, haroro gaukara ita karaia goadagoada, iseda helaro bona ita abia dae herevadia Iehova dekenai be kudou-maoro taudia dekenai ita hahedinaraia totona.—Ese. 9:4.
5 Painia taihuna ta ia gwau: “Taunimanima be Iehova bona ena hereva momokani idia dibaia totona lau durua be moale gauna badana.” Namona be ita hekwarahi bona ma haida ita hagoadaia, Baibel stadi idia abia totona. Iehova ita tomadiho henia bona ma haida ese ia idia tomadiho henia totona ita durua karadia amo moale badana ita abia.—Kara 20:35.