Hemataurai Dabua Bona Tauanina Ena Toana
1 “Tatau iboudiai, memero danu, ese nektai idia atoa. Hahine bona kekeni iboudiai, badadia bona maragidia, ese dres eiava sket idia atoa. Jins oi itaia lasi bona siedi edia aiona idia kehoa lasi. Iboudiai edia toana be namo herea.” Nius sivaraina ta be unai bamona ia hereva. Edena bamona hutuma ia herevalaia? Politikol hebou, a? Spot gadarana ta, a? Rok miusiki taudia, a? Lasi momokani! Ia ese lagani gunana ai idia karaia distrik hebouhebou badana dekenai idia lao tadikaka bona taihu hutuma ia herevalaia.
2 Hebouhebou idia karaia taoni ma ta dekenai, niuspepa ena ripota tauna ta ese Witnes taudia be inai bamona ia herevalaia: “Tatau iboudiai be goeva bona dabua namona bona nektai idia atoa. Hahine ese hemataurai dabua idia atoa to edia toana be namo herea.” Tau ma ta, sekuriti tauna, ia gwau: “Umui be kara namo, hemataurai, goeva, bona toana namo taudia. Lau itaia gaudia ibounai be hairai herea. Inai tanobada mirona lalonai, umui ese miro umui kokia diba!” Unai hereva ese ita idia hanamoa bada! Ita moale bada, badina iseda tadikaka oreana be unai bamona idia hanamoa diba, ani? Momokani, idia noho taudia ibounai edia toana ia namo dainai, unai bamona idia hanamoa diba.
3 Tanobada ibounai lalonai taunimanima idia diba iseda toana ia idau. Dahaka dainai ia idau? Badina Baibel ena sisiba ita badinaia bena ‘mai manau bona mai hemataurai danu iseda dabua ita kwatua, unai be Dirava idia matauraia taudia edia kara korikori.’—1 Tim. 2:9, 10.
4 Emu Dabua Bona Toana ese Dahaka Idia Hahedinaraia? Ita karaia dabua bona ita atoa dalana ese iseda kara—ita abia dae gaudia, iseda lalohadai, bona iseda palani—idia hahedinaraia goevagoeva. Ita abia hidi sitaelo ese ia hahedinaraia ita be daika bona dahaka ita karaia. Inai tanobada dekenai idia ura henia lalohadai bona kara mirodia ita habadaia lasi. Sitaelo ta be hari idia ura henia eiava lasi be mai anina lasi, to sibona ia gwauraia Dirava ena hesiai tauna dekenai ia hegeregere be mai anina bada. (Roma 12:2) Ita ese sibona eda ura laloa bada lalohadaina eiava matabodaga mauri dalana ia hahedinaraia sitaelo ita abia hidi lasi, to ita ura hahedinaraia ita ese ‘Dirava ita hanamoa’ momokani.—1 Pet. 2:12.
5 Nega haida, ta ia matamata, ena diba ia bada lasi, eiava lauma dalanai ia manoka dainai, reana tanobada ese ia gwauraia namo dabua bona tauanina ena toana ia abia hidi, bona unai ena anina Iehova bona iena orea dekenai ia laloa lasi. Reana ita ibounai ese sibona eda kara ita tahua, bena ita itaia tanobada ena lalohadai ita abia dae, eiava. Reana momo ese idia matauraia bona lauma dalanai ia lo tadikaka eiava taihu dekenai ita lao diba bona ena lalohadai eda dabua bona toana dekenai ita nanadaia, bena ia gwauraia herevana ita laloa namonamo.
6 Momo idia abia dae haraga, hebouhebou lalonai idia karaia dabua idia naria namonamo be namo. To program murinai edia dabua idia namo lasi. Keristani hesiai taudia dekenai idia hegeregere dabua oi karaia hanaihanai. (2 Kor. 6:3, 4) Herevana edeseniai ita lao, iseda lapel kadi bona eda dabua bona tauanina ena toana namona ese taunimanima vairanai idia hahedinaraia ita be Iehova ena Witnes taudia. Unai dainai, hanaihanai hemataurai dabua ita karaia namonamo be namo, bona unai amo ita hahedinaraia ‘ita be tanobada ena lasi.’—Ioa. 15:19.
7 Namona be hari lagani ena “Basileia Harorolaia Goadagoada Taudia” Distrik Hebouhebou dekenai do ita hamomokania, ita be ‘Dirava ena bese korikori’ taudia. Unai amo ia vara hemami namona ese Iehova ena ‘ladana ia hanamoa bona habadaia.’—Deu. 26:19.
[Box on page 14]
Iehova Hanamoa Daladia:
■ Dirava ena hesiai tauna dekenai idia hegeregere dabua oi karaia.
■ Tanobada ena lalohadai idia hahedinaraia sitaelo oi dadaraia.
■ Hemataurai ita hahedinaraia, unai ese ia hamomokania ita laloa maoromaoro.