“Basileia Harorolaia Goadagoada Taudia” Distrik Hebouhebouna amo Namo Bada Oi Abia
1 Ita Ia Hagoadaia Program: Vanegai iseda distrik hebouhebou dekenai, ita ia hagoadaia program ita moalelaia! Ita hebou be mai ena badina badana, ita ia durua Dirava ena Basileia ita harorolaia goadagoada totona. Hereva henia tauna ginigunana ese “haroro” herevana ena anina ia hahedinaraia be oi laloatao, a? Hereva ladana “Oi Gari Lasi Badina Iehova be Ita ida Ia Noho” amo ita idia hagoadaia, dahaka sivaraidia ita tahua be oi laloatao, a? Edena mauri sivarai momokanina oi tahua vadaeni?
2 Hereva ta mai ena kahana toi, “Hahetoho Idauidau ese Iseda Abidadama Idia Tohoa,” be Iehova ese dagedage ia koua lasi ena badina badadia ia hahedinaraia. Idia be dahaka be oi gwauraia diba, a? Iseda Keristani gini siri karana dekenai, Baibel ena hereva be dahaka? Ita idia hagoadaia dahaka do ita karaia be namo, bena do ita hegaegae iseda gini siri karana dainai ita davaria hekwakwanai ita hanaia totona? Edena dala ai mai kamonai ida hahetoho ita haheaukalaia karana amo Iehova ita hanamoa?
3 Drama ladana “Nega Dikadia Lalonai Gini Goada” dekenai, edena kahadia ese oi idia hagoadaia momokani? Edena dala ai Ieremia bamona ita kara diba?
4 Pablik tok ladana “Hari Inai Tanobada Ena Toana Ia Idau Ia Lao,” ia hahedinaraia vaira neganai dahaka anina bada gaudia haida do idia idau momokani bena Dirava ena dina mai garina do ia mai? Hereva dokona, “Basileia Harorolaia Goadagoada Taudia Bamona Kara Namodia Ita Habadaia,” oi kamonaia lalonai, edena dala ai idia gwauraia herevana be emu haroro gaukara lalonai oi badinaia?
5 Ita Badinaia be Namo Hereva Badadia: Hereva ladana “Tanikiu Karana Umui Hahedinaraia” ai idia gwauraia hegeregerena, edena dala ai Iehova dekenai iseda tanikiu karana ena bada ita hahedinaraia diba? Hebouhebou ena hereva badana, “Basileia Harorolaia Taudia be Edia Ura Bada ese Idia Ia Hasiahua,” ese ita ia hagoadaia, daika ena haheitalai ita tohotohoa be namo? Ita idia noia edena bamona ita sibona eda kara ita tahua totona?
6 Hereva ta mai ena kahana toi, “Mika Ena Peroveta Herevana ese Ita Ia Hagoadaia Iehova Ena Ladana ai Ita Raka Totona,” ia hahedinaraia Iehova ena lalo-namo ita abia totona, edena hahegani toi ita badinaia be namo? Ita karaia diba, a? (Mika 6:8) Hereva ladana “Oi Goeva Noho Totona Emu Kudouna Oi Gimaia” lalonai idia hahedinaraia hegeregerena, edena dala ai ita kara goeva be namo? Hereva ladana “Koikoi Karadia Dekenai Naria Namonamo” ese ita ia sisiba henia, dahaka gaudia amo ita sibona bona ma haida ita koia lasi?
7 Hereva mai ena kahana toi, “Basileia Harorolaia Taudia ese Edia Hesiai Gaukara Idia Hahairaia” amo, edena heduru herevadia be emu hesiai gaukara lalonai oi badinaia matamaia vadaeni? Inai hereva ladana “Lauma Gaudia Herevalaia Karana ese Ita Ia Hagoadaia” lalonai, Filipi 4:8 idia herevalaia. Unai siri ese edena bamona ita ia durua lauma gaudia ita herevalaia totona, bona edena negai unai ita karaia be namo?
8 Hereva ladana “Hisihisi Negadia Lalonai Iehova Abidadama Henia Momokani” ese ia hahedinaraia edena bamona ita ese idia vara dika badadia, moni ena hekwakwanai, gorere ena hekwakwanai, ruma bese ena hekwakwanai, bona tauanina ena manoka karadia ita hanaia diba. Unai hekwakwanai idia vara neganai, edena bamona ita hahedinaraia diba Iehova ita abidadama henia?
9 Lauma Dalanai Dava Bada Gaudia Matamatadia: Mai moale ida inai buka matamata Worship the Only True God ita abia bona danu ita idia hadibaia unai buka be gabeai Hiri Motu gado bona New Guinea Pidgin gado ai do ita abia. Unai buka idia karaia ena badina idia gwauraia neganai, edena dala ai ia be mai anina oi dekenai? Iseda hahediba taudia halaoa gaukarana lalonai, dahaka dainai unai stadi bukana iharuana do ita gaukaralaia be heduru bada gauna?
10 Bena buka matamata Draw Close to Jehovah ita abia. Ena gau namodia haida be dahaka? Edena laulau oi moalelaia bada bona unai buka ese Iehova kahirakahira dekenai oi ia veria lao, a? Daidia danu be unai buka amo heduru idia abia diba?
11 Unai “Basileia Harorolaia Goadagoada Taudia” Distrik Hebouhebouna ese lauma dalanai hagoadaia hereva namodia ia henia, inai nega aukadia lalonai ita haheauka totona. Unai hebouhebou amo namo bada ita abia totona, namona be ita hekwarahi idia gwauraia herevadia ita lalodiatao noho, ita abia gaudia ita moalelaidia, bona ita dibaia gaudia ita badinaia. (2 Pet. 3:14) Unai ita karaia neganai, ita do ia hagoadaia kara maoromaoro do ita badinaia noho bona Iesu ita tohotohoa dainai Basileia harorolaia goadagoada taudia ai do ita lao, unai iboudiai ese Iehova do idia hanamoa.—Fili. 1:9-11.